U Piyush Pandey uwi na ki bru wa pynkylla ya i kaam chna Advertisement ha India da khlaad noh u ynne ha i rta wa 70 snem hadien wa yakhun pyrchah ya ka Coma la chi bnai.
U Piyush da embynta u wow chna ya ki Advertisement ya ki mar kamjooh ki seiñ saiñ pyrthai.
Ya u Piyush da kha ha Jaipur, heiwa da kreh u ha ki kaam Advertisement neitæ da klam u ha ki Radio chirup wa u payu u, u Prasoon.
Chwa wow kreh u ha Ogilvy & Mather India ha u 1982, da man u kam u Account Executive, heiwa da lehke Cricket u wa kiwi de. Hapoh ka Ogilvy, da kreh u ha ka chnat Creative Department wei hadien won kam u National Creative Director, Executive Chairman (India) wa Global Chief Creative Officer.
U Piyush da pawnaam u hadien wa chna u ya ki Advertisement ya ka Cadbury – “Kuch Khaas Hai”, ya ka Fevicol – Fevicol Bus, Fevicol Fish, Fevicol Sofa, ya ka Asian Paints – “Har Ghar Kuch Kehta Hai”, ya ka Fevikwik – “Todo Nahin, Jodo” wa kiwi.
Ha ki saiñ hima da thoh u ya ki kyntien “Abki baar Modi sarkar – BJP” ha ka Election MP 2014 wa “Achche din aane wale hain”.
U Piyush da thoh u leh ya i sur “Mile Sur Mera Tumhara” kam chibynta ka National Integration Campaign ha u 1988.
Hapoh i yahkhmat u da tipmit ya ka Ogilvy India kam kawi na ki Agency wa boon Award bha. Ha u 2018, u Piyush Pandey chirup wa u payu u da yoh u ya ka Lion of St. Mark, Cannes Lions’ Lifetime Achievement Award. Ha u 2014, da yoh u ya ka CLIO Lifetime Achievement Award wei ha u 2016 da yoh u ya ka Padma Shri.
Ya i khlaad syndet u Piyush da sñiawkhia nadooh u Prime Minister, ki montri ka sorkar pyrdi wa kiwi.
Discussion about this post