Ka sorkar Meghalaya da pynmih ko ya ka Office Memorandum ha ka 25-09-25 lyngba ka chnat Personnel & Administrative Reform (B) yow phah pyndam kreh ya waroh kiwa chah thung kam ki Adhoc ha ki Sanctioned Post hadien ka 31-12-2007 wei daw hap ki wow yaleh Exam yow yoh yei kreh.
Ka sorkar ha ini i pynbna da ong ko wa ki sorkar warim nadooh u snem 1978 da khang ki yei thung kreh Adhoc khlem da thung kreh ki DSC næ ka MPSC tangwa da pteiñ ini ha kiwa boon ki chnat heiwa da chah ksoh kiwa boon ki kreh wa man kam ki Sanctioned Post iwa ma leh pyrchah ya ki kyndon thung kreh wa ka State Reservation Policy.
Ka sorkar dadep chim rai ko wow Regularise ya kitu kiwa thung kreh kam ki Adhoc iwa da leh ha næ chwa ka 31-12-2007 deiwa booh ki kyndon tangwa kiwa chah thung won hadien ka 31-12-2007 ym ye wow chah Regularise ki yow man kam kiwa kreh sorkar wa pura.
Katkam wa da yoh yukheiñ ka chnat Personnel & A.R. (B) da em 1,514 ngut kiwa da thung kreh kam ki Adhoc ha ki Sanctioned Post hadien ka 31-12-2007 wei ini ye ko leh wow rap boon.
Tangwa yow lait u man wa dooh yei hok kiwa chah thung kam ki Adhoc, daw pynyinsur yei rta (Upper Age Limit) yow ye wow yaleh kreh sorkar deiwa chong yaleh ya ki Exam wa pynman da ka MPSC/DSCs/Recruitment Boards/Committees.
Heiyatoh wa ini, neiliang ka VPP da thoh ko cha u Montri Rangbah, u Conrad K Sangma yow pyrchah yeini i pyndam kreh ya kini ki Adhoc deiwa dawa wow Regularise noh ki neibhah da e ki yei chakri la 15 snem deiwa kylli leh ileh khyrngiat ka sorkar dang ha u 2025 wei ini wa leh kamni daw ktah bha ko ya kini kiwa chah pyndam kreh nadooh i liang poisa poilaiñ wa i bor pyrkhat pyrdaiñ ki.
Heijooh i por da dawa leh na ka sorkar wow pyndooh pyndam noh ya kam kini ki jait thung kreh Adhoc neibhah wa man ko pyrchah ya ki kyndon aiñ ka sorkar wei neini chakhmat wow pynkitkhlieh ha kitu sahep sorkar kiwa leh yeini.
Discussion about this post