Ha ka 8 tarik uni u bnai, u MLA ka Raliang, u Comingone Ymbon uwa man leh kam u kongsan yong katai ka sngi, da wan wai pyrda u ya ka Khnap Thangbru yong ka 5 Chnong (Lumlyngdoh, Khliehchnong, Moolephaw, Iongthma, Iangkar) Committee, Raij Nongjngi kawa em ha Riat Sukra Khliehchnong Nongjngi.
Ha kani ka sngi da wan wow ya chimbynta deilang wa u BDO ka Thadlaskeiñ Block, u Dr. Heimonmi Niang kam u symbood kongsan, ki dkhot ka Seiñ Raij Jowai wa ki dkhot na ka Seiñ Raij Chnong Tuber Chohchrieh kam kiwa chah khut sñiawbha chirup u Pa Dolloi ka Elaka Nongjngi, ki waheh wasiañ yong ka Seiñ Raij Nongjngi chirup deilang wa ki manbei ki manpa kiwa chong chnong yong ka chnong Nongjngi waroh kawi.
Chwa wow wai ya kani ka Khnap Thangbru da em ka yalang wa da pynman neibynta wow ya sneiñ ya kroo heiwa ya ka yalang da pynlai da u Proson Kam (Chairman ka Committee). Da yoh leh yei klam i batai bniah na u Genesis E. Kam (Dkhot Ka Committee) heiwa da khana u yei lai luti yong ka khnap thangbru kawa da yoh yei yarap wow chna na ka sorkar Meghalaya deilang ka sorkar India heiwa u Comingone Ymbon wa u Vincent Pala (MP warim) da man ki kiwa hakhmat wow pynyoh ya kani ki Scheme kawa chongdor Rs.18,00,000.
U Genesis da e u leh i yaroh wa heh wa khroo ya u tynraw tynde u Wh. Kambel Shullai, uwa da em sakhiat i bor chemphang wa mayaan, heiwa oo da stat sakhiat u booh u thaw kam kani ka khnap thangbru yow suk ki pateiñ ki khon ka Niamtre u pyndep ya ka Thang ka Riñ.
Da yoh leh yei klam na u Wyraiki Kharbuki (Asst. Gen. Secretary ka Seiñ Raij Jowai) uwa da khana da pynsñiawthooh ya waroh kiwa em heini i thaw chaphang i yarap ka khnap thangbru kawa man kam ka yung wa paka neibynta i pyndep niam yong ka thang ka riñ iwa da sdang chwa wow pynemkaam da ki khon ka Seiñ Raij Jowai, heiwa nyngkong da chna chwa ya kani ka khnap thangbru ha Khimusniang, Jowai.
Da yoh leh i kyntien sneiñ na u Pa Dolloi ka Elaka Nongjngi , na u General Secretary ka Raij Nongjngi, u Ebormi Pale, heijooh i por na u symbood kongsan, u Dr. Heimommi Niang uwa da yaroh wei da pynsñiaw yei sñiawngooh wa khroo ya ki kaam wa da lehbha da u MLA, u Comingone Ymbon uwa da ye u pynyoh ya ka Scheme Khnap Thangbru cha kiwa boon tylli ki chnong lane ki Seiñ Raij kiwa em hapoh ka Constituency ka yong oo.
U BDO da kyntu u leh ya kiwa chong chnong ka 5 chnong wow pynemkaam hok ya ka Khnap Thangbru katkam wa da yoh katkam wa da e.
Khaddooh da yoh yei klam na u Comingone Ymbon uwa da ong wa kani ka khnap thangbru da man ko kawa 17 na waroh ki Khnap Tangbru kiwa oo da pynyoh u hapoh ka Constituency ka yong oo. Da kyrpaad joor u leh ya kiwa chong chnong wym toh u tieñ ki u pynemkaam ya kani ka Khnap Thangbru neibhah ka sorkar da e khnang ko neibynta wow thang u pynemkaam ki khon ka Raij. Da ong u leh wa da jooh yoo u wa em kiwa tieñ u pynemkaam wot hadien wa dadep wai ya ka khnap thangbru leh wei da neh bait ko khlem pynemkaam.
Da kyntu kynpham u ya ki khon ka Raij Nongjngi wow sñiawbha ki u sñiawthooh yeini wa chisien hi wa da wai toh u pynemkaam ka ymtoh wow ieh ka neibhah daw man kamwa brait moolangnai hakhmat ki sniang.
Neiliang ka Local Committee 5 Chnong da e khublei ko ya ka Seiñ Raij Jowai kawa da e NOC wow chna ya ka khnap thangbru, ya ka sorkar kawa da e yarap Rs.18,00,000, ya u MLA, u Comingone Ymbon, ya u MP warim, u Vincent Pala wa da ye ki u pynyoh ya kani ka Scheme, neitæ ya waroh kiwa da ya emktilang hei pynyieñ u pynkhai ya kani ka Khnap Thangbru.
Heijooh i por leh ka Committee da kyrpaad joor ko ya kiwa chong chnong ki khon ka Raij kiwa em hapoh yong ka 5 chnong wow sñiawbha phi kattu u sñiawthooh noh wym hoi de u em itæ i sahdien i tieñ wow pynemkaam ya ka khnap thangbru wei hadien wa dadep i suid i choor toh da hoi u pynemkaam noh ya kani ka Khnap Thangbru.
Discussion about this post