Uwi na kiwa yalap niam Christan wa pawnaam wa tip kam u Rev. Franklin Graham uwa da mut wow poi ha Nagaland ynne ka sngi, ym e Visa ka sorkar India ya oo wei yeini da pyntip da ka Kohima Baptist Pastors Fellowship (KBPF), ka Nagaland Baptist Church Council (NBCC) wa ka Nagaland Joint Christian Forum (NJCF) kiwa da pynkhreh da boon tayaaw ya ini waroh.
U Rev. Franklin Graham toh u khon u (L) Dr. Billy Graham wei da ini iwa mut u wow wan toh hadien 50 snem wa wan u Billy Graham ha Kohima ha u snem 1972 heiwa da sah kynmoo ka kam ka “Kohima Miracle” deiwa em palat 1 lak ngut ki bru wa sakhi wei da e pyrtuid leh ya kawi ka sarok kawa tip kam ka Billy Graham Road kam wow kynmoo burom.
Hanla ym yoh u Rev. Franklin wow wan tangwa kani ka yaseiñ u lai ko chakhmat deiwa yalap u Rev. Robert Cunville heithaw u.
Chwa ini waroh neiliang u CM ka Nagaland, u Neiphiu Rio da ong u wa ka sorkar India da kular ki ya oo wow e ya ka Visa u Rev. Franklin Graham ha ka 27 tarik uni u bnai tangwa ym em yoh wei da khut leh ya oo wow chimbynta u kam u kongsan ha ka 1 tarik u December kawa man leh ka sngi sdang ka Hornbill Festival 2025.
Neiliang won u James Sangma uwa man kam u National Working President ka NPP, da thoh u cha u Minister ka External Affairs ka sorkar India yow pyrkhat deiwi yei wym e Visa ya u Rev. Franklin Graham neibhah ini i wan u toh iwa man kyrpang ya kiwa boon ki Christan ka thaaiñ North-East.
Da ong u leh wa kani ka yalang yong niam toh kawa jai-jai wei ymtoh u sñiawthooh bakla ka kam ka yalang kawa maa ya ka ri.
Discussion about this post