U Symbood Montri Rangbah ka jylla uwa pait leh ya ka chnat PWD (Roads), u Prestone Tynsong ha ka 1 tarik da lai pait u yei pynkreh ya u sarok Shillong-Dawki wei heini i lai pait da chem ya chiboon ki daw wa pynman yei slem i pynkreh ya u sarok.
U Prestone da hukum u leh ya kani ka Company kawa pynkreh ya ka Package-1 kawa man ka sarok 4-Lane na Umshyrpi cha Bañiun wa toh u pyndep bait myntu u bnai December 2025.
Ha ini i lai pait lai sylli, da sakhi wa kani ka Company da pynkreh jhan ko ya u sarok neidaw wa wan u Symbood Montri Rangbah, wei da sakhi wa ha ki bynta ka yingkieñ Umshyrpi wa i kaam dang sah i deiwa boon bha wei kamjooh ha ka thaaiñ 101 wa ka laad wow lai cha Shillong Peak, wei neiliang u Prestone da hukum u ya kani ka Company wa la man katwa man leh wa toh u pyndep hapoh uni u bnai wa kynthup ya ka Flyover ha ka thaaiñ Bañiun.
Katkam wa ong u Prestone, ki daw wa rap eh toh i chimkti yei thaw, wei i eh won ha ka Package -1 toh wow kyrriah ya kiyi kiwa em ha ki thaw wa lai u sarok wa kynthup ya ki Pipe um ka Shillong Greater Water Supply Scheme, ki chrot bordiñ wa kiwi de kiwa pynwit.
Da khana u wa neiliang ka Company da kular ko wow pyndep ya u sarok 4-Lane hapoh uni u bnai wei ya ka Package-2 hadooh Package-5 da phah wow pynkreh rap smat deiwa pynboon ya kiwa kreh yow ye u pyndep hapoh u December 2026.
Discussion about this post