Na ka ram wa chim ka Meghalaya, 90% kawa su da ka sorkar pyrdi pynche u Conrad yeiwa pynbaad u Vincent

U Montri Rangbah ka jylla, u Conrad K Sangma da ong u wa ye u man wa u President ka MPCC, u Vincent H Pala ym sñiawthooh bha u ya ka yukheiñ hawa klam u heiyatoh wa i chim ram ka Meghalaya.

Da ong u wa u President ka MPCC da thmu u wow yahbakla ya ki paidbah neibhah manda yoo ki wa ku ka jylla ym em de ki da iwi wow ong wow pynbaad, heiwa u Conrad da kyntu u wa toh u sñiawthooh chwa wow pynbaad.

Hawa klam hajrong i pynbaad u Vincent, u Conrad da ong u wa man-i-por da pynche u yeini wa ya ka ram wa ka jylla chim ko, da em ki kyndon wa da booh da ka Reserve Bank of India, ka sorkar India wa ka Finance Ministry wei ym ye kiwon kiwon ki jylla u chim palat ya u pood wa da booh heiwa ka Meghalaya ym em jooh chim ko palat ya u pood.

U Conrad da ong u leh wa lada pait yei ku i san ka Meghalaya, kamwa 70% toh ka poisa kawa pynmih napoh ka jylla kawa da pynemkaam yow wanrah yei roi i paar.

Related posts

E khublei ka Salaroh ya u Wailadmiki hadien wa yoh ya u sarok wa sahteiñ da ki phaw snem

December 3, 2025

U tip noh ya ka Prime Minister’s Office (PMO) kam ka ‘Seva Teerth’

December 3, 2025

Da ong u leh wa ye u man wa kini ki ram wa u Vincent klam u toh chaphang ki ram wa chim na ka World Bank, ka Asian Development Bank wa kiwi wa pynreh ya ki Externally Aided Project wei kini toh kiwa da yabhah 80:20 iwa mut wa ka sorkar jylla da sai chwa ko 20% wei 80% won man ko ka ram wei na kani ka 80% daw su 90% da ka sorkar pyrdi.

Kamtæ manda kheiñlang waroh dapoi ko 72% wa su da ka sorkar pyrdi wei 28% da su da ka sorkar jylla kawa hap su kam ka Advance wei iwa ong wa sah ram toh ka wym yahaap.

Da ong u wa u President ka MPCC da pyrchang u wow yahbakla ya ki paidbah iwa man iwa sñiawsih neibhah manda yoo ki yei heh i san ym tip de ki wow ong deiwi tangwa du wow pynkulmar ya ki paidbah.