Ka Seiñ Tyllilang Ñiamtre Ladthadlaboh ha ka 7 tarik ha Yung Dorbar ka Seiñ wa em ha Mookyrdup, Ladthadlaboh da pynman ko i lehkmen lehburom yei dap 25 snem i lai luti ka seiñ heiwa da wan sakhilang da u Lasky Rymbai, Deputy CEM, JHADC kam u kongsan, u O.H. Toi, President Seiñraij Jowai kam u symbood kongsan, u Puramon Kynjing, Dolloi Elaka Jowai wa kiwi ki waheh wasian, ki manbei manpa deilang ki khon khynroo khyllood.
Ha ka yalang yong kani ka sngi hei pynlai u Refil Sari, Secretary Education STNL, da kdar yahkhmat da i pynhær lama da u Puramon Kynjing, pynbood won i ngoohblai ngoohsyiem da u Kamnipaia Challam, Editor STNL, i klam pdiang burom da u Ailut Lyngdoh, President STNL, i klam e sñiawngooh da u Damutmiki Dkhar, General Secretary STNL katwa u Moonlight Ktung, Adviser STNL da khana pynsñiaw u chaphang ka yurim i lai luti ka Seiñ Tyllilang Ñiamtre kawa yieñ u kreh ha ka yurim wow pynneh pynsah yei man kyrpang ka jaitbru kamjooh neibynta i miat i bha ki khon ka Ñiamtre wa wan na kiwi ki Raij ki chnong.
U O.H. Toi hei klam da ong wa ini i leh burom yei kynjoh 25 snem toh ka sngi ka wow kyruiñdien i leh u kynmoo burom kynmoo maya yei pyrtuid i naam yong ki waheh wasian kiwa da chynna jngai wow seiñ u sdang ya kani ka seiñ, neibhah iyi iwa man ynne, ym ye i u man lada ym em kiwa thwat wa tyoor luti nachwa.
Iwa kyrpang chooh leh ong u wa kiwa yahkhmat ka Seiñ Tyllilang Ñiamtre thrang angnood ki wow yoh ya ka ya ka khnap thangbru næ Eco-Friendly Crematorium, yooluti u wa dei yakrehlang chirup da kawi ka thong kawi ka sur, u ye u pyndep yeini i kaam ha ki por ki sngi wow wan.
U Lasky Rymbai, kam u kongsan hei klam dap u dei sñiawngooh sñiawburom wa khroo ya ki waheh wasian kiwa da em i yoo jngai wow sdang ya kani ka seiñ neibynta i suk i saaiñ wei miat i bha ki khon ka Ñiamtre.
Da ong u leh wa kani da man ko kawi na ki chlem sikai kawa ki khon khynroo khyllood na ki chnong ki Raij waphær yohlaad ki wow yachem u saiñdur saiñ yurim yeitæ i maya niam maya Blai wei tip leh u burom u kheiñkor yei man kyrpang ka jaitbru wada khalang chirup wa ka niam, rukom, dustur, riti.
Kiwi ki waheh kiwa da e i klam e mynsien wei kitbok kitrwiang ya ka Seiñ Tyllilang Ñiamtre Ladthadlaboh toh u Rikut Parien, Ex-General Secretary STNL, u S.K.Lato, Founder Member wa u E.M.H.Passah, Adviser STNL.
Iwa rap kyrpang chooh leh kam ka dak wow pynsahkynmoo ya kani ka sngi, u Lasky Rymbai hei synranlang ki waheh wasian da pynlait paidbah u leh ya ka Thup Sah Kynmoo neitae i wai ya u Mot Sahnam Sahkynmoo hei synranlang u E.M.H Passah wei kam ka dak wan i sñiawngooh sñiawburom ya ki waheh kiwa da tyoor da thwat luti wei yakit yabah ya ka lyngkor kam ki yahkhmat ka Seiñ Tyllilang Ñiamtre ha kani ka sngi da em leh i pynkupburom wa kyrpang ya ki.
Discussion about this post