Ka Voice of the People’s Party hei yahkhmat ki dkhot ka Party na West wa East Jaiñtia Hills District deilang wa ki MDC ko na JHADC, ynne ka sngi da lai booh ki dei thoh ha u CEM, u Thombor Shiwat wow dawa na oo u su pyndep noh ya ka tulop kiwa kreh iwa da sahteiñ la kamwa 9 bnai haroh iwa da khynjoh cha ka Rs. 8 klur.
Hawa klam cha kiwa thoh khubor hadien i e kti ya ka chithi, u Jamshaphrang Pohtam MDC ka VPP na War Central ong u wa ka chnat DCA ka sorkar jylla wa ka Executive Committee yong ka JHADC toh u pynche ki yei daw wa hap pynchitom pynjynjar ya kiwa kreh deiwa pyndooh tulop, næ wa em iwa pna leh bakla lehtam hi ki.
Ini i dooh tulop kiwa kreh ka JHADC la 9 bnai ong u lada toh neibynta ki Minister ki sahep ka DCA ym ktah ko iyi iyi leh neibhah kamwa em kiwa jooh ong wot yei bai baam ki jait wa ri ki ha yung leh da su da ka sorkar.
Neibynta ki pli kiwa kreh wa khian ka JHADC won ym em man kamtæ, man pathan kam u chieh wa dung wei dooh thiah ki miet wa sngi.
Chooh chooh ong u hei sakhiat ymtoh u jia kamni neibhah wa ka sorkar wa yahkhmat ha ka jylla wa JHADC toh ka jooh.
Ong u kiwa kreh ka District Council hap kylla nongmylla sngi, nongmylla kynta ki cha ki yung bru wei poi u pood wa hap pynchah ram ki kat iwa em ki, du yow yoh thied khoo ha yung.
Em leh ki manbei manpa wa hap maad yei eh katni heiyatoh wa ka Result ki khon ki kti du neidaw wom yoh poisa su bai skur, seiwi leh uni u toh u bnai lehkmen neibynta ka Christmas wa u snem thymme.
Kini kiyi kiyi waroh ong u ktah bha i yei bor pyrkhat ki manbei manpa kamjooh leh ya ki khon ki kti.
Kamtæ ka VPP dawa ko na u Montri Rangbah ka sorkar jylla wa na ka Executive Committee ka JHADC wow su smat noh ko ya ka tulop wa sah kiwa kreh hapoh ka 16 tarik uni u bnai, kawa man leh ka bhah yong ka Council hi.
Lym kamtæ ka VPP maham ko u pynman yakhih wot u khang tala syndon ya ka yung krehkaam ka JHADC.
Discussion about this post