Ka Northeast Frontier Railway da pyntip ko wa ka Sairang Railway Station ka Mizoram da yoh ko ya ka nyngkong dooh ka Automobile Cargo Rake heiwa da wanrah 119 tylli ki kari ka Company Maruti na Changsari kawa em hajan ka Guwahati.
Da ong wa ini daw pynhiar i yei dor ki kari ha Aizawl wa ki thaw wa em chajan.
Kani ka luti rel wa dang wai thymme ha uni u snem ha Mizoram wa tip leh kam u Bairabi-Sairang Railway Line, toh uwa jrong 51.38 Km wei em u 45 tylli ki Tunnel yow pynyabi ya ka Mizoram wa ka ri India heiwa da yoh ki leh ya ka Rajdhani Express kawa lai cha Delhi, ka Mizoram Express kawa lai cha Guwahti wa ka Express Train cha Kolkata.
Ki paidbah da pdiang ki deiwa kmen yei wan kini ki le tylli ki rel heiwa ka Sairang-Anand Vihar Terminal Rajdhani Express toh kawa dadap bait 147%, ka Sairang-Guwahati Mizoram Express 115% wei ka Sairang-Kolkata Express 139%.
Ini da yarap ko ya ki paidbah wow pynduna yei lutsan ki hei lai i wan yei kaam i jaam kamjooh hawa kjut wa chitom deiwa lai phah sumaar cha baar.
Ka rel kit mar (Freight Train) ha uni u Bairabi-Sairang Line da sdang nadooh ka 14 tarik u September 2025 deiwa wa 21 tylli ki dhaba rel wa kit khyndaw-bilat na Assam cha Aizawl wei hadien da wan leh kiwi ki mar nadooh ki mooria, chyiap wa kiwi ki mar chna yung.
Ki mar wa pynmih na Mizo wa kynthup ya u syntu Anthurium da phah nyngkong ki cha Delhi ha ka 19 tarik u September 2025 wei hadooh uni u bnai dadep wow phah 17 sien.
Discussion about this post