Hadien wa mih khubor wa pynbaad ka seiñ Meghalaya Peoples’ United Front (MPUF) wym em biang i e phñiang ka Petrol Pump Syngkon Lyngdoh Filling Service kawa em ha chnong Laskeiñ, West Jaiñtia Hills, neiliang u tre kani ka Petrol Pump, u Founderson Syngkon da mih u chakhmat wow pynche yeini i chah pynbaad deiwa ong wa kani ka Petrol Pump ymtoh kawa kreh kaam pyrchah aiñ wei nadooh wa sdang da bood ryntih ko katkam ki kyndon aiñ sorkar wei yong ka Company. Wei neiliang ka chnat Metrology leh neipor cheipor jooh wan thaw wan pait bniah ko yei pñiang ha kani ka Petrol Pump.
Hawa klam cha kiwa thoh khubor, u Founderson Syngkon ong u nyngkong ka seiñ MPUF ha ka 03-12-2025 da e chithi ko wow paan Donation neibynta i lehkmen dap 15 snem ka seiñ kamjooh leh wow thap phñiang dei mynkna ya ki kari ki dkhot ka MPUF kiwa lai cha kani ka yalang lehkmen kawa pynman ha ka 06-12-2025 ha Jowai.
Hadien wa yoh ya ka chithi, u Founderson Syngkon da Phone u cha u President ka MPUF wow pyntip wym ye u wow e phñiang cha ki dkhot kani ka seiñ tangwa kam ka dak i yakrehlang da e Donation u katwa sñiaw joh i bor wei da e u leh Rs. 300.
Ha ka 16-12-2025 won ka seiñ MPUF da wan ko cha ka Petrol Pump yong oo heipor wa oo deilang u Manager ym em ki, wei em du kiwa kreh donhi.
Mar ya poi da phah thap phniang ki ha u jerkin deiwa riñ Video, ong u hei sakhiat toh u riñ Video ki nadooh ka Machine hadooh u jerkin yow chynna yeiwa sakhiat la toh wa duna i phniang.
Hadien ini won Phone ki cha oo deiwa ong wa chem ki duna i phñiang ha kani Petrol Pump, tæ kylli ki na oo la toh wa dang sñiaw emkaam yaklam u wa ki, lym kamtæ u lai bait ki cha ka aiñ. Da e juba u ya ki wa ini i kreh i khih u ymtoh iwa pyrchah aiñ, tangwa deiwa biang ki kot ki sla wei bood ya ki kyndon, wei lym sñiaw yahaap ki wow lai chakhmat.
Neitæ manda lai ki chakhmat wow ujor ha Raliang Police Station, kamjooh cha ka chnat Metrology, ha ka 19-12-2025 da em ka Joint Inspection ya kani ka Petrol Pump wa kynthup ya u Officer In-charge ka Raliang Police Station, u Officer ka chnat Metrology wa ka seiñ MPUF.
Ha kani ka sngi deiwa ya sakhilang manda thaw u sahep Metrology ha ki ar tylli ki jerkin kawi kawa rah u na ophis yong oo, kawi won ka jerkin kani ka Petrol Pump wei chem u wa i phñiang man iwa biang, da ong u Founderson Syngkon.
Neitæ hawa pait u Metrology Officer ya ki Machine leh chem u wa ki Seal leh dang em dang biang ki katkam wa Seal ki heipor nachwa.
Wei wot u Metrology Officer leh ha katai ka sngi ong u wym em chem u i duna, waroh man iwa biang katkam i chem u ha katai ka sngi.
Chooh chooh u Founderson ong u wa oo yakrehlang bait u wa ki seiñbhalang kat i bor wa ye u, tangwa wow leh won ki da kani ka luti ym em sñiawsuk u neibhah wa oo kreh u ya kani ka kaam dei hok.
Wei ki paidbah wa chaniah phñiang na kani ka Petrol Pump nadooh wa sdang ym jooh em iwon iwon i pynbaad na ki neibhah katwa ye e u i chakri wa paka.
Da pynche u leh cha ki paidbah wym em itæ i leh thok leh jlær kamwa da pynbaad da ka MPUF. Da suba u leh ye u man du neidaw wym hun ki ya ka Donation wei wym em bien u e phñiang mynkna cha ki dkhot ka seiñ, kamtæ e khubor pynbaad bakla noh ki ya ka Petrol Pump yong oo.
“Hao kat i bor wa ye pyrchang bait i u yarap ya kiwa paan yarap, tangwa i leh cheiwon u ye ware u e mynkna bait neibhah hap hi i u pyndap pynbiang ha yung ha sem,” da ong u tre Petrol Pump.
U Founderson pyntip haroh u wa ha kani ka Petrol Pump yong oo da em leh ka Auto Machine wa Control da ka Company, heiwa ym ye hi u leh thok neibhah yei boon i duna ka phniang leh da yoo ka Company wot katwon wa dai leh ka da tip bait ko.
Discussion about this post