Ka luti lai kjat wa em hadooh 543 tylli ki rana kawa jrong 230 meter, kawa kmai 5 phut kawa em ha Caroline Colony, Jowai kawa poi ha sarok Myntdu Bypass hajan ka yingkieñ Myntdu da wai paidbah ka ynne ka sngi da u MP ka Rajya Sabha, u Dr. W.R. Kharlukhi.
Ya kani ka Scheme leh da e yarap na u MP hi lyngba ka MPLADS Scheme yong u snem 2023-2024 ha ka mang poisa wa Rs. 10 lak.
Ha kani ka sngi wai, neiliang u waheh chnong ka Caroline Colony, u Embhahlang Lyngdoh khana u wa da boonsien ka chnong pyrchang paan Scheme ko na ka chnat sorkar yow chna ya kani ka luti kjat tangwa ym em yoh ki, kamtæ pynsñiaw u i sñiawngooh ya u Dr. W.R. Kharlukhi uwa da smat u yarap neibynta ini i angnood wa da slem yong ka chnong.
U Adviser ka chnong Caroline Colony, u M.S. Lhuid hawa klam da pynsñiaw u yei lai luti yong ki hei wow pait bniah wei pynkhreh ya ka mang poisa neibynta kani ka luti khnang yow pynsuk wei pynjan i lai luti hapyrdi ki para wa chong chnong kiwa sah cha tre ka wa kiwa sah chaneiñ.
U Dr. W.R. Kharlukhi hawa klam ong u ya kiwa chong chnong ka Caroline Colony wym emkaam u e khublei ki ya oo neibhah toh i kaamram yong oo hi kam uwa mihkhmat wow lehbha won ya ki paidbah kiwa da e kyrchaan wei pynkup ha oo ya kani ka kyrdan.
Kamwa man kattæ ong u ka Scheme wa da pyrchang won u toh ka College of Tourism khnang wa ki khynnah yong i u yoh ki u lai puræ, neibhah wa da yoo u ka Tourism man kawa yarap bha ya ki khynnah ym du ha ka jylla yong i tang wot u lai cha baar ka jylla wa ka ri, deiwa e nongmuna ya kiwa dep puræ tæ lai kreh cha baar.
Kamwa boon ki khon khynroo khyllood ood ki wym yoh kreh yoh khih, ong u jan da toh i por wym toh u yooluti khih du ha chnong da toh u tooh laad lai khih wot cha baar, najrong wow em i mynsien wow nood u tia chaphrang.
Discussion about this post