Ki bru wa da suba toh na ki seiñ Hindu da psiah yabor ki hapoh kawi ka Restaurant wa em ha Bareilly, UP heipor wa dang pynman yei lehkmen sngikha heiwa da pynbaad wa ini toh i leh “Love Jihad”. Ki pulit da wan ki ha ini i thaw wei da daiñ kuna ki ya ar ngut ki khynroo wa man kam ki Muslim kiwa da emlang wa 8 ngut kiwi ha kani ka thaw wei da chah daiñ kuna leh uwa kreh ha kani ka Restaurant neidaw wa pynthut yei suk i saaiñ.
Ini da jia i ynnin ka sngi heiwa kawa lai puræ First-Year BSc Nursing da khut ko ya ki 9 ngut ki lok ko wow lehkmen sngikha ha ka Restaurant wa em ha Prem Nagar heiwa kiwa da wan toh 5 ngut ki kynthai wa soo ngut ki chynrang wa kynthup ya u Shan wa u Waqif kiwa man kam ki Muslim.
Ki pulit da ong ki wa neidaw wa em kini ki khynroo Muslim deilang ka kynthai Hindu da pynman ya kini ki bru wow psiah ki cha kani ka Restaurant yow pynthut yeini i lehkmen heiwa da kbai ki leh ya ki kyntien Jai Shri Ram wei katkam i Video wa da poor, da yoo leh ya uwi u khynroo wa chah thaap wei uwi won uwa da chong ha kdong wa paan maap.
Ka kynthai wa pynman ya kani ka lehkmen sngikha leh da yoo wa yaam ko wei kini ki bru wa wan pynwit da kbai da kyrhieh ki ka heiwa da pynbaad ki ya kini ki khynroo Muslim wa leh ki ya ka Love Jihad.
Ki pulit da wan ki wow pynlait ya kini kiwa lehkmen napoh kani ka Restaurant heiwa da rah ya ki cha Police Station yow kylli takit ya ki.
Da chem leh wa kani kawa pynman yei lehkmen sngikha toh kawa sah ha kawi ka Hostel wa em ha Prem Nagar wei dang lai puræ BSc Nursing ko ha kawi ka Private College wei hadien wa jia ini da pyntip cha kiwa ha-yung ha-sem ko.
Ki pulit da daiñ kuna ki ya u Shan wa uwa kreh ka Restaurant wa tip kam u Shailendra Gangwar tangwa hadien wa tip ki wa em sa uwi u khynroo Muslim, u Waqif da ong ki wa da yut u neibhah wym em chem ki oo heipor wa lai ki cha kani ka thaw tangwa ya oo leh da phah daiñ kuna deiwa e daw wa pynthut ki yei chongsuk chongsaaiñ.
Discussion about this post