Ki pulit ka Maharashtra da kem ki ya uwi u bru uwa 25 snem i rta hadien wa tem u yei sur pyrchah ri wa tip kam i “Kashmir Banega Pakistan” deiwa pynheh bha ha i dukan iwa em mar pyrchah ka Temple wa em ha Chinchoti, Palghar iwa da pynchrai ya ki paidbah wa chong chnong.
Katkam wa pyntip ki pulit, u Sub-Inspector Pankaj Kilje dang lai Patrolling u da ka kari u heipor kamwa 1:30 i sngi wei da sñiaw u yeiwa em wa pynheh bha ya ini i sur na ka dukan ah sñiooh wa tip kam ka Ruhann Hair Cutting Salon iwa em mar pyrchah ya ka Durga Mata Mandir.
Yeini i sur da wa em wa tem lyngba ka Mobile Phone ha kawi ka Bluetooth Speaker wei waroh kiwa em chajan da sñiaw ki.
Neiliang ki pulit deiwa pyrkhat boi deiwa leh kamni daw poi chei kulmar, kamtæ u SI Kilje da psiah u hapoh kani ka dukan wei da chem u ar ngut ki bru hapoh, uwi u Guljari Raju Sharma (51 snem) uwa kreh heini wa u Abdul Rahman Sadruddin Shah (25 snem) uwa na chnong Gauri Sirajpur, Uttar Pradesh.
Ki pulit deiwa takit da chem ki toh u Abdul uwa tem yeini i sur na YouTube lyngba ka Phone u ha ka Blutooth Speaker.
Kiwa chong chnong dei chrai da ksoh ki leh ya uni u bru wei manda pait ki pulit ya ka Phone u da chem wa oo wa tem yeini i sur wei da pynchrai i ya paidbha neidaw wa em ka Mandir pyn hajan.
Ki pulit da pynngat ki ya u Abdul hapoh ka Section 197(1)(d) ka BNS kawa man ka kyndon wa klam yei chah ktah i man yatylli ka ri wei da kem ki oo pyn ha kani ka thaw katwa uwa krehlang ha kani ka dukan ym em chah kem u.
Discussion about this post