Ki bor District ka West Khasi Hills, da chimkhia ki yei yap ka khynnah wa dang le snem kawa na chnong Domkyrkoh katwa dang lai yah ka cha thaw sumaar heiwa ki bor District da pait bñiah ki yei daw hadooh wa poi cheini wa jia wa lada toh nei wym yoh yei sumaar, i wym yoh kari, i eh i lai iwan wa i sih ki luti syngkieñ iwa da pynthut ya ki paidbah ka thaaiñ.
Wow tip yeiwa sakhiat yeiwa jia, da paan ya ka bui (Report) na u Block Development Officer, Rambrai Block; na u District Medical & Health Officer (DMHO), West Khasi Hills wa na u Executive Engineer, PWD (Roads) wei dang yang ya ki Report.
Ka yutip wa yoh da ong wa kani ka khynnah kawa na Domkyrkoh toh kawa chitom bha wei emkaam sumaar smat heiwa da lai yah ka cha ka Mawkhiat Sub-Centre, kawa da krehkaam kam ka PM-ABHIM Sub-Centre la kamwa chi snem wei kani ka Sub-Centre jngai ko kamwa chi kynta chiteiñ dei kjat wei haap ko hapoh ka Rambrai PHC.
Da pyntip wa em leh ka kari hapoh ka Chief Minister’s Safe Motherhood Scheme (CM-SMS) neibynta ka thaaiñ wow kit ya kiwa kjut wa chitom tangwa kiwa kreh ha i chait i khiah ka thaaiñ namo ki Local Health Worker ym em u pyntip ya ki heiyatoh wa i chitom i kjut ka khynnah kamtæ ym ye de wow pynkhreh ya ki kari wow kit ya i cha thaw sumaar.
Iwa jia pynyoo i yei chem chitom ki paidbah ka Domkyrkoh neibhah u sarok toh uwa lai luti na chnong Mainop heiwa ym lait kari u lada joor u slap wei ki kari kamai leh man kiwa duna bha ha kani ka thaaiñ.
Ki bor District da tip ki yeiwa sih u sarok kamjooh i chem chitom ka chnong Domkyrkoh wa kiwi na ka thaaiñ kamtæ da em ka Project wa tip kam ka “Road from 4th Km of Rambrai-Mawrok PMGSY Road to Nonglang via Domkyrkoh, Phase-I (10 Km)” ya kawa da yoh poisa na ka Central Road and Infrastructure Fund (CRIF).
Uni u sarok u pynyabi u ya ka Domkyrkoh wei u myntoi ki chnong ka thaaiñ Mawdet heiwa chisien dadep chna daw man u sarok wa bha uwa neibynta kiwon kiwon ki samoi wow pynsuk ya ki paidbah hawa emkaam ki ya iwon iwon.
Neiliang ki bor Distrcit da phah ki ya ki chnat wa yatoh wa ini i kaam chirup wa ka chnat Health Department wow pynman yei takit ha chnong Domkyrkoh ha ka 6 tarik uni u bnai wa ha ki sngi wa bood wow tip yeiwa chem chitom ki paidbah liang wanang khamtam hawa em ki kaam wa jhan wei ya ki bui toh u e kti wut-wut cha ki bor District.
Hadien wa yoh ya ka bui, ki bor District daw leh ki yeiwa emkaam wei heijooh i por ka PWD (Roads) daw booddien ko ya ka poisa wa yoh na ka CRIF khnang wow ye u pynyabi da u sarok psiang ya ka Domkyrkoh wa ki chnong ka thaaiñ Mawdet.
Ki bor District da pynsñiaw ki leh yei sñiawsih yeini wa jia wei daw leh yeiwa emkaam katkam wa chem i takit.
Discussion about this post