Ka District Legal Services Authority West Jaiñtia Hills chirup i yakrehlang ka chnat Forest Jowai, ha ka 9 tarik da pynman ko i pynsñiawthooh paidbah hajrong kammon u em i kitkhlieh neibynta u yada ya ka rymaw, ki soodong sookun kawa da pynman ha pchem ka Jowai Police Station ha Iawmusiang, Jowai.
Ini i pynsñiawthooh paidbah man ko leh chibynta ka Pan India Environmental Legal Literacy & Community Protection hajrong ka phang “Protect today secure tomorrow”.
Ha ka yalang pynsñiawthooh wa pynlai da ka D. Sutong, Chief Legal Aid Defense Counsel, da yoh i klam na ka M. Suchiang, Government Pleader ka chnat Forest, West Jaiñtia Hills, na ka S.M. Saioo, Asst. Aid Defense Counsel West Jaiñtia wa na u Range Officer Social Forestry, Jowai Division.
Kini kiwa klam da pynsñiaw ki hajrong i emkaam yong i khooid i suba ha ki soodong sookun, najrong wa pynsñiaw leh yei emkaam u thung ki dieñ ki seij neibhah ki dieñ em ki ka bynta wa khroo u yada ya ka rymaw kamjooh yei im ki bru.
U Range Officer Social Forestry Jowai Division ong u i chim ka sorkar pyrdi ya kani ka laad toh hadien wa yoo ko yei man wa sih ka suiñbneiñ ha Delhi.
Kamtæ kamwa ka phang yong kani ka pynsñiawthooh paidbah kawa ong yada katni yow im ki pateiñ, ong u emkaam na ka pateiñ wa katni u yada khnang wa ka pateiñ hadien leh u im ko.
Wei hei im u bru iwa emkam tam man-ka-sngi toh ka la’ær, ka um wa ka khyndaw, kamtæ toh u sumaar wei yada ya kini dang katni khnang yow lait mih i tngit ka la’ær, ka um wei chah ktah ka khyndaw. Neibhah lada tngit chah ktah ka rymaw, booh ko hei maa yei im u bru.
Kamtæ yow lait na kini kyntu u wow thung ki dieñ, wei kamwa sñiawthooh wa emkaam hi u ah dieñ neibynta iwa emkaam kam ki bru tangwa toh u kynmoo leh u thung.
Discussion about this post