Ka Jowai Diocese Catholic Youth Movement (JDCYM) da pynman ko ya ka XVIII Annual Youth Convention 2026 ha Holy Trinity Parish Sutnga haka 16, 17 wa 18 tarik uni u bnai wei da man ko kawa chitrhem wa chongkun deiwa wan chimbynta ki khon khynroo khyllood na ki Parish wa Unit waphær waphær wa haap hapoh ka Jowai Diocese.
Ha ka sngi sdang da pynman da ka Mass Wa Khooid ka ngooh ka dem Blai da u Fr. Lawrence Paswet, Diocesan Youth Director ryngkat i synranlang kiwi ki phadar wei da wan wai pyrda da u Vincent H Pala, President ka Meghalaya Pradesh Congress Committee (MPCC) kam u kongsan katwa ka Marbiang Nongtdu, Assistant Lecturer da wan ko kam ka symbood kongsan deilang kiwi kiwa chah khut sñiawbha.
Ha kini ki 3 sngi yong ka Convention da yoh chiboon i sneiñ i pynyoo na ki khroo pyrkhat pyrdaiñ hajrong kiwa boon ki mat ka wow tei yei rukom im ki khynroo na ki Resource Person nadooh u Stanley Bareh, u Fr. Cresent Roy Laloo wa ka Sr. Wansuk Lyngdoh.
Da pynman leh yei pynsñiawthooh paidbah hajrong ka Voluntary Blood Donation yow pynchlur ya ki khon khynroo khyllood ka Balang u wan chakhmat yow e snaam sñiawbha deiwa ya krehlang ka Kyrmen Foundation wa ka Meghalaya State Blood Council.
Kamjooh leh da yoh yei pynsñiawthooh hajrong ka kjut HIV/AIDS yow tip ya ki laad yada khnang yow lait u kharoi ha ka imlang sahlang iwa da batai bniah da ka Rinibeth Patlong.
Ha ka Sngi U Blai da pynkut ya ka Convention da ka Mass Wa Khooid wei Mane Sacrament wa da yahkhmat da u Bishop Ferdinand Dkhar, DD ryngkat i synranglang kiwi kiwi ki Phadar, ki Sister, ki Brother wa kiwa chah khut sñiawbha ryngkat wa ki paaid wa ngait ka Balang.
Heipor noh chariñ sngi da yoh i klam pynsñiawthooh wei pharia ya ka ktien u Blai hajrong ka phang: “To wad ïa u Trai katba dang lah ban shem ïa U” Isaïa-55:6 da u Fr. Marcelinus War, Holy Redeemer Renewal Centre, Umroi.
Da pynkut ya kani ka Convention deiwa pynhiar ya ka lama ka seiñ da u Salanbor Kamar (Former President, Batch 2013-2017) kam u kongsan heiwa u Mutshwa Thabah (Former President, Batch 2019-2022) kam u Symbood Kongsan ryngkat wa i sneiñ i kroo i kyntien e mynsiem cha ki para khynroo khyllood yong ka Balang.
Kam wow e mynsien chooh chooh ya ki khon khynroo khyllood kiwa da kreh chitom kiwa da chakri bha ha ka kaam yong ka Balang, da e da ka khusnaam cha ki 38 ngut deiwa jied 2 ngut na kawi na waroh ki Parish wa ka Shillong Unit.
Ha kini ki ar sngi kam chibynta u yohlaad ki khon khynroo khyllood ka Balang u pynyoo ya ki sap ki phong yong ki, da pynman da ka Bible Skit Competition hei wa ka Mowkyndeng Parish da jop ko, ka Ummulong Parish da yoh wa ar ko katwa hei wa le da yoh da ka Barato Parish.
Ha ka Self Composed Singing Competition da jop da ka Cathedral Jowai Parish, ka Shillong Unit hei wa ar katwa ka Ladrymbai Parish hei kyrdan wa le.
Hadooh wakut yong kiyi kiyi waroh, da khylliap em warom ya ka lama yong ka seiñ, wei wa da e kti noh ya ka cha ka Immaculate Conception Parish, Mowkyndeng neibynta ka XIX Annual Youth Convention 2027.
Da pynphooh pynphieñ ya kani ka yachemlang deiwa pynchongchit da ka put ka tem ka rwai ka siaw ka chaad ka kmen.
Discussion about this post