U Biangshwa Shylla uwa man kam u President ka Jaiñtia Hills Truck Owner Association (JHTOA) hadien wa chah pynbaad wa yut u na ka General Meeting ka seiñ wa da pynman ha Takhniang, East Jaiñtia Hills District ynnin ka sngi khamtam ha u Balen Thubru uwa da pynmih ya ka khubor, da kyntait u yeini waroh.
Neiliang u Biangshwa da pynche u wa u Balen ymtoh u dkhot ka JHTOA heiwa ym em hi leh pynthymme u ya ki kot ki sla wei man u leh kam u dkhot kiwa boon ki seiñ wei ha katu ka sngi da wan u deiwa klam dei sih dei sang wei ka Meeting man ko kawa lai bait lai ryntih tangwa da mih noh i awri awra hadien wa wan ki bru na kiwi ki seiñ.
U Biangshwa da pynche u wym em yut u neibhah dapoi u ha kani ka thaw nadooh 10:00 waje i step wei da mih u heipor 4:00 waje i janmiet katwa u Balen won heipor 1:00 waje hadooh 1:30 mih u na kani ka thaw, kamtæ u Biangshwa da kylli u uyi u bru wa yut.
Da ong leh wa u Balen toh uwa da lai psiah cha kylleiñ ki seiñ tangwa da wan u ha ka yalang ka JHTOA khlem da man kam u dkhot wa em pyrtuid hapoh ka seiñ.
Kamtæ da ong wa kam ka JHTOA ym em luchia ko ya ka seiñ u Balen kawa pait yei kit Cement wa Clinker tangwa oo won manda chah ah poisa ki ka bai kit kawa Rs. 50-60 chi Ton wei chah ah biang sa Rs. 300 manda chim bai kit, iyi leh u Balen manda jia kamni hawa chah ah poisa kiwa kamai Truck.
Da pynche leh wa katkam ka riti krehkaam ka seiñ, du ki dkhot kiwa da Register kiwa ye u pdiang wei da lai luti katkam ka Constitution ka seiñ, wei da kyntu ya ki paidbah wym toh u chah pynbiej heini i rukom pynbaad u Balen kiwa khlem yurim suda.
Da kdaw leh yeiwa ong u Balen wa dadep u wow man President la 15 snem ya ka seiñ tangwa ym mut wa ye u wow kamtre ya ka seiñ manda rem u. Da kylli leh iyi leh u kam u President la 15 snem.
Kattæ da pyntip u Biangshwa wa wot yei thaw leh dadep thied wa chongdor Rs. 24 lak 75 hajar yow chna ya ka Office ka seiñ yow ye u pyndap pynbiang yeiwa emkaam ka seiñ kam ki kot ki sla ymtoh de kam nachwa kiwa im bait dei yongrim.
Discussion about this post