Ha ka 28 tarik uni u bnai kam chibynta wow pyndep yeiwa da kular heiyatoh wa i chakri paidbah, neiliang u Sniawbhalang Dhar kam u MLA uwa man leh kam u Symbood Montri Rangbah ka jylla, da pynlait u ya ka Work Order wa chongdor Rs. 10 lak yow chna ya ka Community Hall ha chnong Moodop.
Hawa e kti ya kani ka Work Order, u Sniawbhalang da ong u wa ki kaam pynroi ym man du dei ktien donhi tangwa da ki kaam wa yoh myntoi ki paidbah. Da ong u leh wa ka Community Hall man ko kam ka rynsan paidbah neibynta ki yalang chnong, i rukom lai leh ka riti dustur wa ki kaam paidbah waphær waphær kawa pynkhlan wei pynyatylli wei wanrah leh yei ya krehlang hapyrdi ki paidbah.
Da ong u leh wa i yahkhmat yong oo em ka thong kawa che yow pynpoi ya ka roi ka paar cha ki chnong wa emkaam bha yeini khamtam ha ki chnong wa em cha palatsor wei ini i kreh man ko ka sabut wa ka sorkar NPP kreh hok ko yei kaam pynroi ya ki paidbah, ym du iwa kular heipor Election.
Da kyrpaad u leh ya kiwa pynkreh wow pyntikna wa kreh yei kaam deiwa bha heipor wa da booh khnang wa ki paidbah u yoh myntoi smat ki.
Neiliang kiwa kitkaam ka chnong Moodop da pdiang sñiawbha ki yeini wa da yoh yarap wei da pynsñiaw ki leh yei sñiawngooh ya u MLA, deiwa ong wa ini i chna ya ka Community Hall wa chongdor Rs. 10 lak pynyoo ko yei yaphær hapyrdi kiwa yahkhmat kiwa klam dei ktien donhi wa kiwa leh dei kaam.
Discussion about this post