Hadien wa da ood da naam ki paidbah wym em Network ka Airtel ha Woodland WK Hospital kawa em ha Sabahmuswang, kamtæ neiliang ka seiñ JNC Western Zone hapoh i yahkhmat u President yong ka, u Hamehi Bamon chirup wa ki dkhot da lai hiar ki cha kani ka thaw heiwa da chem wym em Network sakhiat wei tlot bha i krehkaam ha kani ka thaaiñ.
Kamtæ ka seiñ da lai dawa ko na ka yung krehkaam ka Airtel wow pynbiang Network wut-wut khlem da pynslem cha kani ka thaaiñ khamtam ha ka Hospital.
Da dawa leh wow chna ya u Tower wa Thymme ha Sabahmuswang, wei neiliang ka seiñ da maham ko wa lada ym leh smat ki katkam wa dawa, daw khang ko ya waroh ki yung krehkaam ka Airtel kiwa em hapoh ka Ri-loom Jaiñtia.
Hadien ini, ha ka 27 tarik uni u bnai heipor janmiet, u Manager yong ka Airtel na Shillong da pynman u da ka Conference Meeting lyngba ka Phone deilang wa u Hamehi Bamon chirup wa ki heh yong kani ka Company.
Heini i yaklam, neiliang ka Airtel da rai ko wow chna da u Tower wa thymme ha ka chnong Sabahmuswang katkam wa dawa ka seiñ, heiwa ka Airtel da paan yarap ko na ka JNC wow yarap thooh thaw heiwa ka seiñ da kular ko wow chimkhia yeini yow pynyoh yei thaw wa biang hajan ka Hospital.
Ynnin i step won neiliang ki bru ka Airtel da wan lai pait (Survey) ki ya ini i thaw wa da yaklam da ka seiñ, wei da kular ki wow pynyieñ yow chna wut-wut ya uni u Tower ha ka chnong Sabahmuswang.
Neiliang ka seiñ da dap ko dei sñiawngooh ya ka Airtel wa ap ko yei dawa ka sieñ neibynta ki paidbah.
Discussion about this post