U President ka Jaiñtia National Council (JNC), u Sambormi Lyngdoh da ong u wa i jia pdung ha ka krem mooyong ha Thangksoo toh nei kheiñstiñ ki bor pynlai District neibhah wym em chimkhia ki wot hadien wa por ki Video nachwa wa pynyoo wa jia ha Thangksoo wei da dawa u na ka sorkar jylla wow phah khynreh naphang ya ki bru kiwa sah pyrchah aiñ ha East Jaiñtia Hills wei kamjooh leh wow wanrah noh da ka Small Scale Scientific Mining.
U Sambormi hawa yaklam wa kiwa thoh khubor ynne ka sngi ha Shillong Press Club da ong u wa nyngkong ka seiñ pynsñiaw ko yei sñiawsih sñiawlem cha kiwa ha-yung ha-sem kitu kiwa da khlaad noh.
Da ong u wa kam kawi na ki seiñbhlang wa em ha East Jaiñtia Hills neipor cheipor da jooh yoh sñiaw ki yei tih mooyong hapoh Thangksoo iwa man deiwa laitlan iwa da wanrah ya kiwa mylla na ka ri Bangladesh wei kam ka seiñ da suba wa ini wa jia pdung ha krem mooyong dang ini wadep ha Thangksoo ymtoh de iwa jia hi-eh kamtu.
U Sambormi da ong u wa boonsien kam ini da jia i ha ka thaaiñ tangwa iwa dangdep jia toh kawa yoo chyrkhei. Wei lada ka sorkar da thung ko da ka Judicial Inquiry, tangwa ka seiñ da dawa ko ya ka sorkar wow thung da ka takit yeiwa wanrah ya kiwa kreh mylla kiwa na baar ri.
Chooh chooh da ong u wa i yoh laad ki bru kiwa na baar wow sah pyrchah aiñ da booh ko hei maa ya ki paidbah yong ka District khamtam hadien iwa jia ha Thangksoo iwa da pynchong syier wei pynoo ko leh wa ka Elaka hap ko wow chim yei kitkhlieh wow pait yei psiah ki bru kiwa na baar.
Neiliang ka seiñ da dawa ko ya ka sorkar wow wanrah noh da ka Small Scale Scientific Mining khnang wow pynooh yei tih mooyong pyrchah aiñ neibhah kamwa 80% kiwa chong chnong kiwa em ya ki paar mooyong toh da ki Small Scale.
Discussion about this post