Ka Khasi Students’ Union (KSU) East Jaiñtia Hills District Unit khlem da artatien da pynbahkhlieh bait ko ya ka sorkar jylla yeiwa jia ha ka krem mooyong wa em ha Mynsyngat-Thangskoo ka East Jaiñtia Hills ha ka 5 tarik uni u bnai heiwa da dooh ya 32 tylli ki mynsien bru wei da mynsoo boon ngut deiwa ong wa ini da jia i leh neidaw wa ka sorkar ym ye ko wow pynkrehkaam pyn da ki aiñ yong ka hi yow khang yei tih mooyong pyrchah aiñ kamjooh yow khanglaad yei psiah kiwa khih mylla na baar jylla wow lute ya ka jylla.
Da ong leh wa kam ka seiñ neipor cheipor da pyndong ko ya kiwa psiah chapoh ka jylla khlem da biang ki kot ki sla.
Heiyatoh wa i chah pynbaad wym em lai ka seiñ cha kini ki thaw wa jia, da ong wa ki bor chnong ka Elaka Sutnga toh kiwa krehkaam laitlooid wei ym chah ki ya kiwa na baar wow psiah ki khlem da yoh bor, kamtæ ki seiñbhlang ym yoh ki wow psiah cha kini ki thaw, tangwa da ong won kammon yoh laad kini kiwa tih mooyong wei ini toh i kitkhlieh da ka sorkar kamjooh ya iwa jia wa sñiawsih.
Da kylli leh kammon sang wa da palat 200 ngut kiwa khih mylla wa ye ki u poi cha kani ka thaw wa em cha kdong bha najrong wa da iwa boon Ton u mooyong wa kit na kani ka thaw khlem da tip ki bor District, ki pulit wa kiwi de ki chnat sorkar deilang ka JHADC.
Da ong leh wa i pynbna wow thung da ka Judicial Inquiry yeiwa jia ha Thangskoo toh iwa thylli wei iwa leh najrong donhi hadien wa joor chrai ki paidbah. Neibhah da ki snem ka Committee wa thung da ka High Court da chem ko yeiwa boon u mooyong wa tih pyrchah aiñ najrong wa wiar u mooyong wa dadep chim yukheiñ.
I suki ka sorkar da e laad ya kiwa tih wei chalan tooh ya u mooyong, da ong ka seiñ.
Da ong leh wa u Chief Minister wa pait ya ka Mining & Geology wei hap u wow kitkhlieh yeini wei da hap wow pynkrehkaam da ka Inner Line Permit deiwa chim biang sa ka Resolution sa chisien ha kani ka dobar mang tangka wa daw pynman.
Ka khubor na u Streamly N Suchen, President KSU EJHDU.
Discussion about this post