Ka Bangladesh Nationalist Party (BNP) kawa yahkhmat da u Tarique Rahman da khreh ko wow wan biang hei bor hadien 20 snem deiwa jop suk ya ka Election deilang ki lok ko yow yoh 212 tylli ki Seat heiwa ka BNP samen da jop ko 209 tylli na ki 350 tylli wa em hapoh ka Parliament.
Ka Bangladesh Jamaar-e-Islami Alliance da jop ko 77 tylli katwa ka National Citizen Party (NCP) kawa man ka Party thymme kawa da seiñ da ki khynroo wa pynman yakhih da jop ko du 6 tylli donhi ki Seat.
Kiwa thap Vote da mih ki 60% kiwa da jied leh wow pynman ya ka Referendum yow pynkylla ya ki kyndon synchaar khadar deiwa chah wow man Prime Minister du ar sien donhi kamjooh wow e bhah rap chiboon ya ki kynthai.
Hadien i yakhih wa joor bha ha Bangladesh ynnin u snem wa yahkhmat da ki khynroo Gen-Z, da yooluti ki wow wanrah yei kylla hapoh ka ri tangwa hadien wa thap Vote da yoo wa ki paidbah da chaniah ki ha ka Party warim hi ka BNP kawa dadep wow synchaar ya ka ri la le sien.
Ka BNP ym em leh bien ko wow pynyabi wa ka Party ki khynroo ka NCP hanla ki toh kiwa pynman yakhih yow pynhaap ya ka sorkar.
Kiwa yahkhmat ka NCP da sdang ki wow dooh yei chaniah ki paidbah hadien wa sdang ki wow yatoh lok wa ka Jamaat-e-Islami. Ka NCP nyngkong da mut ko wow yakhun Election na waroh ki Seat tangwa hawa kut da ye ko wow yakhun na du 30 tylli donhi.
I chongchit ki paidbah ya ka NCP leh suki-suki wiar i hadien wa yoo ki wym ye ki wow leh yeiwa kular ki.
Discussion about this post