Ha ka 13 tarik uni u bnai, u Montri ka chnat Bordiñ ka sorkar jylla, u Metbah Lyngdoh da wan hiar u wow wai ya u mooyurim ka madan thymme wa em hapoh ka chnong Bataw wa tip kam ka Lai-Phew Krem Playground Bataw kamjooh da pynhaap pyrda u ya ka 4th Umsyngki Knockout Football Tournament 2025-26 wa pynlai da ka Bataw Rumshnong Youth Club, kawi na ki Club wa da rim bha hapoh chnong Bataw kawa da seiñ nadoh u snem 1967 da ki longchwa manchwa.
Da synranlang ya oo da u MLA ka thaaiñ, u Kyrmen Shylla uwa man kam u Adviser ka chnat Mining & Geology yong ka sorkar jylla kam u symbood kongsan hei emlang ka Stephanie Rapsang, District Sports Officer, East Jaiñtia Hills District, u Dr. Tammiyaki Shylla, Block Development Officer, Wapung C&RD Block wa u Manish Kumar, Deputy Commissioner, East Jaiñtia Hills District kam kiwa cha khut kyrpang. Heithaw yong u DC da wan da ka F. Wan, Assistant Commissioner, East Jaiñtia Hills District wei da emlang leh wa u Lasky Rymbai, Dy. CEM JHADC, u Wailad Siangshai, Dy. Chairman JHADC, u Fineliness Bareh, Ex-MDC, u Joinriwell Pyrtuh, Ex-MDC wa kiwi kiwi de kiwa chah khut sñiawbha.
U kongsan hawa e yei klam da yaroh u ya ka Club yeiwa chakri ko da slem bha ya ki paidbah heiwa da man ko leh kawi ka Club wa da rim bha wot hapoh yong ka jylla wei da kynmoo u leh wa kiwa yahkhmat ka chnong da wan yachem ki wa oo ha kamra krehkaam u ha Secretariat Shillong neibynta kawi na ki dong hapoh ka chnong Bataw wa tip kam ka Dong Mihsngi Bataw ka wym pu em bordiñ da boon tylli ki snem.
Kamtæ da ong u wa da yoo sakhiat u yei kreh chitom kiwa yahkhmat wei neiliang yong oo da pynpsiah u hapoh ka Scheme Additional Household Electrification Scheme neibynta ka Dong Mihsngi wei ymtoh u artatein ki ya ka bordiñ kawa daw yoh noh ha ka chnong Bataw.
Neiliang u Deihok Sumer, Waheh Chnong Bataw uwa man leh u President ka Club hawa e yei klam da pynsñiaw u yei sñiawngooh ya u Montri wa da chimkhia u yeini kamjooh ya u MLA wa da booddien u yeini i dawa ka chnong wei ha kani ka sngi da e leh ya ka dorkhat ha u Montri wow pynyoh 3 tylli ki Spring Chamber hapoh ka chnong Bataw.
Discussion about this post