U khynnah wa puræ Class-9 na Meghalaya da jop u ya ka Award ha ka North East Science Fair & Innovation Festival 2026 deiwa chna u ya ka rukum (System) wow chem smat lada lait (Leak) ka Gas yow lait u jia na iwon iwon iwa sñiawsih.
Uni u khynnah toh uwa tip kam u James Donald Kharkongor uwa lai puræ ha Mawngap District Christian Multipurpose Higher Secondary School, wei ya kani ka khusnaam da yoh u ha ka National Science Centre, Guwahati, kawa man kam ka chnat ka National Council of Science Museums.
U James toh uwa na chnong Laitpynter Synrangkaban, East Khasi Hills wei u pa u toh uwa sikai skur katwa ka bei u toh kawa pait ya ki kaam yung.
Da ong u wa da kwah u wow pynemkaam yei buit u neibynta ka ri wei kani ka Smart LPG Safety and Hazard Prevention System kawa da chna u toh kawa pynemkaam da ki Gas Sensors kiwa ye wow pait yei rukom man ka la’ær wei lada em ka Gas Leak pynkieh ko ya ka Alram.
Da emlang leh wa ka Exhaust Fan ka wow skit mar ya em ka Gas Leak yow pynhær jngai ya ka Gas yow lait nei kop diñ.
Da em leh ka Automatic Solenoid Valve kawa khang ya ka Gas mar ya jia wa lait ko iwa da yarap chooh chooh wow yada nei kop diñ næ i pdung.
Kani ka System toh kawa pynemkaam leh ya ka IoT kawa mut wa ye wow pait yei long i man hanla ym em ha yung wei daw pyntip ko mar ya jia wa em ka Gas Leak.
Ka Innovation Hub ka Shillong Science Centre toh kawa da yahluti ya u James heini wa da pynchna u.
Kani ka North East Science Fair and Innovation Festival 2026 toh kawa da pynman nadooh ka 11 tarik uni u bnai hadooh ka 14 tarik ha National Science Centre ka Guwahati heiwa da wan kiwa boon na kylleiñ ka thaaiñ heiwa u James da man u kam uwi uwa jop.
Discussion about this post