Ka Hynniewtrep Integrated Territorial Organisation (HITO) hadien wa dadep ko wow paan pynche na ka chnat Mining and Geology ka jylla hajrong i tih tooh næ e bor ko ya ki 7 tylli ki karkhana Cement ha Jaiñtia Hills wow tih palat 3 klur 28 lak Ton u moochuni kam utæ uwa mih ryngkat hi-eh heipor wa tih (Incidental Limestone).
Hajrong ini da lai paan pynche nadooh ka 9 tarik u December 2025 na ka sorkar jylla hajrong kawon ka kyndon yong ka Mines and Minerals (Development and Regulations) Act, 1957 wa e bor ya ka sorkar jylla wow kheiñ ya kiwon kiwon ki mar pohkhyndaw khamtam ya u moochuni wa pynemkaam da ki karkhana pynmih khyndaw wow kheiñ kam utæ uwa mih hi-eh hawa kreh ki namo ka Incidental Mining.
Tangwa neiliang ka sorkar jylla hadooh kattæ ym pu ye ko wow e jubab, kamtæ ka seiñ ynne da lai ujor ko cha u Montri ka sorkar pyrdi, u Kishan Reddy uwa pait yei tih marpohkhyndaw.
Neiliang u General Secretary ka seiñ, u Wanbun Dkhar da ong u wa deiwa kheiñ næ e bor wow kheiñ yei tih moochuni kam ka Incidental Mining, ini da pynroi ko yei tih moochuni pyrchah aiñ da ki karkhana Cement neibhah katkam ka RTI wa da yoh da ka seiñ da chem wa em du 35 tylli ki Mining Lease neibynta u tih moochuni haka thup Minor Minerals ha East Jaiñtia Hills wa 18 tylli ha West Jaiñtia Hills District katwa ki paar moochuni wa da pynkreh da em ki da ki spah tylli wei ka sorkar hap ko wow leh iyi iyi neibhah ini da wanrah ko yei dooh nong ya ka sorkar na ki dan wa toh u yoh na ki mar pohkhyndaw.
Discussion about this post