Ka sorkar Meghalaya ynne da wanrah ko hapoh ka yung dorbar ya ka Report ka Expert Committee kawa da thung yow pait deiwi ya ka State Reservation Policy, heiwa ka Committee da tyrwa ko wow pynneh ka kamjooh hi kamwa da leh nadooh u snem 1972 wei ye u pynkylla ki kattu katni yow pynkhlan yei rukom pynkrehkaam ka.
Kani ka Committee toh kawa da mynjur wei da pynbna da u Lat ka jylla ha ka 12-09-23 wei da phah wow e ya ka Report hapoh 12 bnai wei ha kini ki por da khut wei da lai yachem ko wa kiwa chong chnong yow ap u sñiaw yeiwa yeiwa e buit ki.
Ha ka kyrwoh khubor na ka sorkar da ong wa ka Reservation Policy toh kawa da pynkrehkaam nadooh u snem 1972 iwa mut da palat 50 snem kattu wei kani ka Committee da pait ko ya kiwa boon ki jait nadooh i bhah chooh chooh ya ka rukom bhah kreh neiwa da em kattæ, i pait ya kitu kiwa da ku da mahajon wa kiwi de.
Ka Committee da ong ko wa ka Reservation ymtoh wow pait kiwon ki jaitbru wa heh paaid tangwa toh u pait ya kiwa dang sahdien, kiwon ki wym yoh laad na ki daw wa boon wa jia nadooh ki por warim wei da ong leh wa ka niam ym ye wow man ka kyndon wow kheiň wow yoh ya ka bhah kreh.
Heiyatoh wow pynkrehkaam ya ka Reservation Policy ha ki thaw puræ, da ong wa ka sorkar ye ko wow pait yeini wei wow leh ki katkam wa yoo emkaam.
Hajrong wa ka puræ puthi ha ki District ka Garo Hills, ka Committee da tyrwa ko cha ka sorkar wow leh iyi iyi wa mang bha ya ki thaw puræ yow ye ki u ku kamjooh yow yoh kreh sorkar ki.
Neibynta won kitu kiwa man kam kiwa dooh wa duk Economically Weaker Sections (EWS), ka Committee ym em tyrwa ko wow e yei myntoi wa yoh ki EWS cha ki SC, ST wa OBC neibhah ki EWS toh u em ki da ki yong ki hi ka bhah.
Yei pynkrehkaam ya ka Carry Forward System, ka Committee da kyrchaan ko yeini katkam ki kyndon ka 1972 Resolution. Wei da tyrwa wow pteiň yeini sa chi snem hadooh le snem neibhah ini toh iwa da tipmit leh da ka aiň wei daw yarap ko wow pyndap ya ki kreh kiwa sahkut da slem khlem pyndap.
Heiyatoh won wa ka phang wow phiah chooh chooh ya ka Quota (Sub-Classification), ka Committee da ong ko wa hadien wa pynmih hukum ka Supreme Court ha ka mukotduma State of Punjab vs. Davinder Singh, da chem wa ini i leh Sub-Classification pynhapoh ki Reserved Category toh iwa chah katkam ka aiň wei da emkaam wow chim yukheiň deiwa bniah bha lada leh yeini.
Ka Committee da tyrwa ko leh wow pynkrehkaam ya ka “Creamy Layer Principle”, heiwa chah hi katkam ka aiň yow pyntikna wa i bhah kreh u lai ko cha kitu kiwa dooh wa duk ki wym yoh laad.
Ya kitu kiwa em i duna hei bor i doh i pran, da ong wa da em chwa ki kyndon aiň hapoh ka Rights of Persons with Disabilities Act, 2016 wei ka sorkar Meghalaya leh da leh ko ya iwa boon iwa biang, kamtæ ym em da tyrwa ya iwon iwon iwa thymme.
Heiyatoh wow e yei kreh cha ki tre chnong ki District neibynta ki jait kreh Class C wa D Post, ka Committee da sňiaw ko wa ini toh iwa ye u man iwa eh wow leh neibhah katni boon ki bru kiwa mih na kawi ka chnong cha kawi tangwa iwa da pynkrehkaam da ka sorkar katni toh iwa da biang yow pait yeini.
Da ong leh wa i pynkrehkaam ya ka 1972 Resolution kawa da nadooh u 12-01-1972 man ko kawa biang katkam ka aiň wei da leh yeini da palat 50 snem.
Heiyatoh wa i pynkrehkaam ya ka Reservation Roster, da ong wa emkaam wow leh ka deiwa khooid deiwa man salonsar hawa khut yaleh kreh.
Ka Committee da pynkut ko deiwa ong wa hadien wa da ap da sňiaw yeiwa da wan pynsňiaw wan e buit kiwa chong chnong, kiwa boon toh kiwa kyrchaan wow pynneh ya ka Reservation Policy kamwa da jooh man nadooh u snem 1972 wei ym em ki daw wa biang wow pynkylla ka.
Kamtæ ka Committee leh da sňiaw ko toh wow pynkrehkaam ya ka Reservation Policy kamwa man hi ko.
Discussion about this post