Ka Meghalaya High Court ynne da chong bichaar biang ko ya ka mukotduma heiyatoh wa i tih mooyong pyrchah aiñ hapoh ka jylla wei da bichaar yeiwa jia ha Mynsngat-Thangskoo heiwa da ong wa da yap 34 ngut kiwa kreh ha kani ka krem mooyong wei da em 5 ngut kiwa da mynsoo joor heiwa da wanrah leh ya ka Status Report ka sorkar.
Ha kani ka Report da khana iyi wa da leh nadooh ka poisa wa Rs. 24 lak kawa da su cha kiwa emyatoh ki 8 ngut kiwa yap wei ka Judicial Enquiry Commission da pynman ko ya ka takit heiyatoh wa ini wa jia wei da em leh ka Special Investigation Team kawa da thung wow yow chem tre yeiwa da jia kamjooh yow pait yeiwa tyngkheiñ ya ka hukum ka Meghalaya High Court næ ka yong ka NGT wa kiwi kiwi de.
Da pyntip leh wa da em 77 tylli ki FIR wa da booh wei da kem ya 14 ngut ki bru wa kynthup ya le ngut ki tre paar mooyong heiwa da kem leh 16,260.5 MT u mooyong wa tih pyrchah aiñ deilang wa 74 tylli ki Detonator wa 22.5 Kg ki Gelatine Stick.
Da chah Suspend leh ar ngut ki Officer In-Charge yong ka Police Outpost wa haap hapoh ini i thaw wa jia wei da kyrriah leh ya u SP ka East Jaiñtia Hills District.
Ka High Court da phylla ko leh wa kammon ym pu em su ka poisa yarap sa cha ki 15 ngut kiwa khlaad kiwa na Nepal wa 13 ngut won kiwa na Assam heiwa da e daw wa chem chitom wow chem wei wow pyntikna ya kiwa emyatoh ki.
Kamtæ da phah wow yaklam lyngba ka Nepal Embassy heiyatoh wa ini kamjooh wow leh smat neibynta kiwa na Assam.
Ka yung bichaar da ong ko wa sa iwi wym em booh kyndon neibynta ka takit toh yow chem kiyi wa thied ya u mooyong neibhah lada ym ye u dai oo, ym tih hi leh nadooh wa sdang.
Da phah leh ya u Pankaj Rasgania, SP wa u Vikash Kumar, DC ka East Jaiñtia Hills wow emlang ki manda pynman biang yei bichaar ha ka 05-03-26.
Discussion about this post