Ka BJP Meghalaya lyngba u Wankitbok Pohshna uwa man kam u State General Secretary ka BJP Meghalaya Pradesh da dawa ko wow paan maap u Sunil Deodhar uwa man u Founder ka My Home India wei kam u National Secretary warim ka BJP hadien wa da klam u ya ki kyntien wa ktah yei sñiaw ki Christan ha ka yalang wa da pynman ha Pynther wa em ha Pynursla Sub-Division ka East Khasi Hills District.
Da ong wa i klam u Sunil toh iwa pyrchah ya ki Christan deiwa yoo beiñ leh ya ka Bible heiwa da klam beiñ leh yei pyrtuid u Jisu Khrist deiwa ong wa oo toh uwa na baar “dkhar”. Wei ini toh iwa da ktah yei sñiaw ki Christan ka Meghalaya kamjooh ya waroh kiwa burom ya kiwi ki niam wa i rukom burom ya para bru.
Da ong wa toh sakhiat wa ya ka niam Christan da wanrah cha ka thaaiñ Northeast kamwa 186 snem tangwa ymtoh u mylliñ wa u Apostle Thomas dapoi u cha South India kamwa 2000 snem nachwa wei wow klam beiñ ya u Jisu Khrist kamjooh ya ka Bible ym yahaap de ha kini ki por wa da che da stat neibhah wot u Prime Minister ka ri, u Narendra Modi leh burom u ya ki Christan heiwa da pynyoo u yeini deiwa kynmoo ya ka sngi Christmas wei da jooh pynkynmoo u leh ya ka ri yeiwa da sikai u Jisu Khrist.
Da ong leh wa waroh da mynjur ki yeiwa emkaam wow pynneh pynsah ya ka Niam Khasi ka Niamtre wei ye u man wa kani ka sorkar wa katni kwah ko wow pynim biang ya dustur riti kiwa da chah ieh mylliñ neidaw wa ki sorkar warim ym em da leh ki yeiwa dawa ki kam ki jaitbru tre ri (Indigenous Population).
Tangwa wot u Modi leh da khut u wow imlang chirup, u wanrah ka roi ka paar neibynta waroh, u pynyoh yei chaniah ki waroh, u ya krehlang waroh wei wow ye u yieñ hei kjat hi kam ka ri India kawa da ku.
Ka niam won man ko i mon yong jar jiar ki bru samen wei ymtoh wow klam yeini hakhmat ki paidbah khamtam hawa i thmu toh wow pynmong yeiwa sñiaw yong kiwi.
Kamtæ da ong wa kam u bru uwa da heh da saan wei u dkhot kawi na ki seiñ wa heh dooh hapoh pyrthai, ka RSS kawa daw lehkmen yei dap 100 snem, ini iwa da klam u daw ktah ko yei man yatylli kamjooh ka yurim wa da chna da tei ya ka ri.
Hajrong ini da kyntu wow paan maap u yow lait nei mong i chah ktah i sñiaw ki bru yow pynyoo leh yei em i thmu wow wanrah yei imlang dei suk i saaiñ.
Ini iwa klam u Sunil Deodhar toh iwa da booh u leh ha YouTube heiwa da pynbaad u leh ya ka sorkar wa lada kwah wow yoh myntoi iyi iyi na ka da emkaam wow kylla niam nadooh wow lai skur, u yoh sarok wa kiwi de.
Da ong u leh wa kitu kiwa da kylla niam toh ki wym em niam de.
Discussion about this post