Ka Jaiñtia Students’ Movement (JSM) da e dorkhat ko cha u Montri Rangbah ka sorkar jylla lyngba u Deputy Commissioner ka East Jaiñtia Hills District ha ka 24 tarik uni u bnai wow dawa thung da ka High Level Inquiry hajrong i wym em u Medical & Health Officer ha CHC Mawiong, Shillong, ha ka janmiet yong ka 19 tarik uni u bnai, heipor wa pynkit ya u (L) Dr. Ricky A J Syngkon, MP Shillong, cha katai ka thaw sumaar.
Katkam i yoh yutip wa tikna ka seiñ da ong wa ha katai ka por ym em u Doctor ha katai ka CHC.
Ka seiñ da pynsñiaw ko lada kam ini i jia ye i u jia ya ki bru wa em kyrdan kam u MP, wei man iwa sñiawkhia wow pyrkhat kammon won ya ki paidbah wa lai thooh yarap ha ki thaw sumaar sorkar.
Ka JSM da kyrpaad ko ya ka sorkar Meghalaya wow thung ko da ka takit wa kyrpang yow chem wa la i wym em Doctor man i du ha katai ka sngi næ kawa jia man-ka-sngi khamtam hadien 5-6 waje i janmiet.
Chooh chooh ka seiñ da ong ko wa i wym em ki Medical & Health Officer ha ki PHC wa CHC waphær waphær ka jylla toh i chem saja neibhah wa jooh jia.
Kamtæ ka JSM da dawa ko na ka sorkar wow hukum ko ya ki bor District u pynman ki i lai li pait sylli syndet syndet ha waroh ki CHC wa PHC ha man ki Block wa District ha Meghalaya, khamtam heipor miet yow pynthkna wa ki Doctor kiwa kreh u em ki hei kaamram.
Ka seiñ ong haroh ko wa da yoh ko i ujor na ki paidbah hajrong i wym em ki Doctor ha ki thaw sumaar sorkar.
Heijooh i por ka JSM da booh yukylli haroh ko hajrong i phah ya ki Nurse yong ka jylla cha Japan, Singapore wa kiwi ki ri yow lai kreh ki wot hawa ka sorkar hi wa ong wa duna ki Nurse haki Hospital sorkar.
Kamtæ ka seiñ da kyntu ko yaka sorkar wow pynmih paidbah ya ka Report hajrong kini ki mat khnang wa ki paidbah u tip u yoh ki yei che.
Discussion about this post