U MP warim ka Rajya Sabha uwa man leh u President warim ka National People’s Party (NPP) Meghalaya, u Dr. Wanwei Roy Kharlukhi da pynbna paidbah u wow kyrchaan ya u kyrtong ka Congress, u Vincent H Pala ha ka Election chiteiñ samoi cha ka Lok Sabha na Shillong Parliamentary Constituency.
Hawa pynbna yeini i rai cha ki laad pathai khubor, u Dr. Kharlukhi da ong u wa da pyrchah joor u yei thmu pynkylla ya ka Foreign Contribution (Regulation) Amendment Bill, 2026 na iwa man ko kattæ, neibhah ka Section 16 (a) toh kawa pynwit sakhiat wei ka wym ye u pdiang.
Da ong u wa lada ym em ka Congress wow pyrchah ha Parliament, katai ka Amendment Bill ye wow man da man aiñ ko kattæ wei ym tip iyi wow jia ya ki Christan wa khian paaid.
Kamtæ da ong u wa kani toh ka daw kawa kongsan kawa pynman ya oo wow kyruiñ khmat yow kyrchaan ya u kyrtong ka Congress, kawa man ka Party kawa da dawa wow sangeh syndon yei wanrah pynkylla ya ka aiñ FCRA.
Hawa kylli, da kyntait u wa daw psiah u cha ka Congress, tangwa ya kattæ mih u chakhmat yow kyrchaan ya u kyrtong ka Congress, wei ya iwa hadien daw pait won.
Neiliang u Vincent H Pala uwa man u President ka MPCC kamjooh u kyrtong MP da pynsñiaw u yei sñiawngooh ya u Dr. Khalukhi uwa da rai wow kyrchaan ya oo kamjooh ya ka Congress.
Discussion about this post