Ka seiñ Jaiñtia Students’ Movement (JSM) da kyrpaad ko ya u Deputy Chief Minister, u Sniawbhalang Dhar wa u Health Minister, u Wailadmiki Shylla wow klam ki hapoh ka Cabinet yow wanrah noh yei bhah ki nong Jaiñtia hapoh ka Reservation Policy khnang wow pynskem yei maya yong ki ya ka jaitbru ka ri-loom Jaiñtia.
Ka seiñ JSM em ko i kyrmen wa skem wa lada kini ar ngut ki Minister wa emburom ka Ri Jaiñtia smat ki u yaklam ha ka Cabinet wa yahkhmat da ka Party wa kiwa yahkhmat yong i, ym artatien wa ki Jaiñtia u yoh ki ya ka yong ki hi ka bhah ha ka Reservation.
Ka seiñ da kynmoo ko leh wa hei sur yalap Election ka NPP heipor wa yaleh MP, da ong ko “To maya jaitbru da ki kaam ym du da ki ktien”, hajrong ini, ka JSM phah ko ka khubor cha kiwa yahkhmat wa ha kani ka kynti kawa biang bha ya kini ki ar ngut ki Minister wow yieñ waheh kam u Kiang Nangbah wow dawa yei hok ki nong Jaiñtia wei lada yeini ym yoh, hiar noh na chuki Minister neibynta u dawa yei hok yong ka Ri Jaiñtia.
Chooh chooh ong ka seiñ wa da yoo wa u MLA yong ka VPP na Nongkrem, u Ardent M Basaiawmoit da wanrah u ya ka Short Duration Discussion hajrong ka Reservation Policy haka 25 tarik u Thohlakhmi (Feb) 2026 wei ha katai ka yaklam da pynmih u du yei kyntien Khasi ymtoh Khasi-Jaiñtia wei ini da pynsñiawsih ko ya ka seiñ waroh kawi.
Yeini ka JSM wym em beiñ ko ya uni u MLA neidaw wa yieñ u haka yurim yong oo wa ye u man leh wa man iwa kwah (Interest) yong ka Party yong oo wei ye u man leh iwa ngait (Ideology) yong oo.
Tangwa ka seiñ da sñiawsih ko neibhah u Sniawbhalang wa u Wailadmiki ym em wanrah ki ya ka Point of Order heipor wym em pynmih ya ka kyntien Jaiñtia da u Ardent tangwa da wanrah ya ka Point of Order hadien ar sngi, itæ toh haka 27 tarik wow klam yeini.
Kamtæ ka seiñ da kyrpaad ko deiwa khian ya u Deputy Chief Minister wa em burom ka sorkar wow yaklam deiwa eh wow pynyoh bhah ya ka jaitbru Jaiñtia ha ka Reservation Policy. “I kiwa chong chnong ka Jaiñtia dang emkaam i chiboon ki laad yarap naka sorkar kamjooh leh ya ki kaam kreh sorkar,” da ong ka seiñ.
Ka seiñ da pynche ko leh wa ymtoh wow pynpra jaitbru tangwa kwah ki wow yoo ya kiwa yahkhmat wa chisien wa da man kam kiwa yahkhmat toh u ksoh skem ya ka yurim rukom man uwa yahkhmat khnang wow lait u pynchit lane pynbakla ya ki khon khynroo wa ya ki khon ki hajar ka Bri U Ynñiawtrep hi waroh kawi.
Man i kam chipayu chidoh chisnaam kam ki khon ka Ri Khasi-Jaiñtia kawi ka jaitbru kam ki khon u Ynñiawtrep.
Ka khubor na u President ka JSM Central Body.
Discussion about this post