I chah ktah ka sor Tura nei yakhih toh iwa da joor bha heiwa ynne i step da sakhi ya ki luti syngkieñ wa chah khang da ki moo, ki yung ki sem wa chah tympra, ki dukan dukdoh wa chah thang wei chah lute hadooh wa da em leh ka kari kawa chah thang.
Ka chnong ka thaw leh da man ko kawa da jakhlia na iwa ieh kiwa pynman yakhih cha sarok nadooh wow thoh ki kyntien cha luti syngkieñ heiwa da mih ki chynrang wa kynthai wow pynkhooid yeini.
Yei jhep wa kiwi ki jakhlia da pynkit da ki kari wa kynthup nadooh ki dwar, ki dieñ, i khyndaw, ki moo wa kiwi de.
Ynne i step da lai hiar leh u Montri Rangbah ka jylla, u Conrad K Sangma cha Tura heiwa da chem u ya kiwa chong chnong kiwa da ksoh saroo ha kti kiwa da lum da pynkhooid yeiwa tngit wa jakhlia ha ka chnong.
U Conrad da lai pait u leh ya ki yung ki sem kiwa da chah ktah heiwa da yaklam u leh wa kiwa chong chnong.
Uwi uwa sah ha thaaiñ Araimile, Tura da pyntip u ha u Conrad wa ki kattæ hadooh u khoo leh da duna deilang kiwi de ki baam, kamtæ u Conrad da Phone u cha ki heh District yow leh ki yeiwa emkaam wow e yarap cha kiwa chong chnong.
Iwa yoosuk u yoo toh kiwa chong chnong ka Tura deiwa yatylli da mih ki yow wanrah yei suk i saaiñ.
Discussion about this post