Ka United Democratic Party (UDP) da e dak ko wym pyrchah ko yei pynyieñ da u kyrtong wa ya monlang (Common Candidate) kiwa em hapoh ka Meghalaya Democratic Alliance (MDA-II) ha kani ka Election chiteiñ samoi neibynta ka Shillong Parliamentary Constituency, hadien wa khlaad noh u MP warim, u Dr. Ricky AJ Syngkon.
Tangwa ka Party da ong ko wa i leh yeini toh deiwa yaklam chwa da waroh kiwa emlang.
U General Secretary ka UDP, u Titosstarwell Chyne ynne da ong u wa ye wow mih i yaklam wow pynyieñ da u kyrtong wa monlang tangwa chong hei rai ka Party lada u pdiang næ kyntait yeini lada em i tyrwa da ka liang synchaar.
Da ong u leh wa ini ymtoh iwa dang thymme wei toh iwa da jooh leh nachwa da kiwa em hei synchaar kamjooh da kiwi ki Party.
“Kattæ dang hap wow paitbniah ya waroh ki laad ki luti. Ka thong wow yaleh Election ymtoh wow pyrchah ya uwon uwon u bru næ ka Party tangwa u jied kyrtong da uwa ye wow mihkhmat ya ki paidbah,” da ong u Titos.
Da kdaw u leh wa deiwa pait yei rukom thap Vote ki bru, da yoo wa jied ki ya u bru ymtoh ya ka Party ha ka Election MP neibhah ki bru tip ki uwon u wow ye u yasaaid neibynta yong ki hapoh Parliament. Wei kiwa yahkhmat ye ki wow pyrkhat deiwi katwa ki paidbah won boon i por pyrkhat ki deiwi.
Da e nongmuna u leh yeiwa jia ha ki por nachwa hawa ya ka Election MLA wa MP da pynman heijooh i por, heiwa ki paidbah da jied ki da ki Party napoh ka jylla katwa cha ka MP won da jied ki da ki National Party iwa pynyoo yei rukom pyrkhat kiwa thap Vote.
Chooh chooh da ong u wa ka UDP ym em jhan ko wow chim rai wei daw lai ko chakhmat deiwa paitbniah wei yow jied da kawon ka luti wow lai.
Ka UDP toh kawa dadep chong yachem ha kini ki sngi wa dep tangwa u Titos da ong u wa ym pu em chim rai ki wei ym pu ye u khana leh yei pyrtuid yong uwon uwon wa da pyrkhat ki.
Discussion about this post