Ka Lion Y&SA da pynrem ko ya ka PCC Phramer da 54 Run ha ka Quarter Final wa le ynne ka sngi yong ka District Cricket League 2026 wa pynman da ka West Jaiñtia Hills District Cricket Association, Jowai yow pisah Semi Final.
Ya ka kylla-khlem da jop da ka PCC Phramer kawa da jied wow kawang bol nyngkong. Kamtæ ka Lion Y&SA hawa Bat da kamai ko 168 Run na ki 32.5 Over deiwa dooh waroh ki Wicket. Na kiwa Bat, u Kitboklang Rngad toh uwa kamai boon Run dooh deiwa yoh 28 Run na ki 50 bol, pynbood won da u Noondaystar Pohrmen uwa kamai 23 Run na ki 24 bol. Na kiwa kawang bol ka PCC Phramer, u Deimiki Rabon da yoh u pynhaap 4 Wicket na ki 6.5 Over, katwa u Ram Ksoo won da yoh u 3 Wicket na ki 7 Over.
Ka PCC Phramer hawa beh ya ka thong da kamai ko du 114 Run na ki 25.1 Over wei da haap ko waroh ki Wicket. Na kiwa Bat yong ka, u James Nongrum toh uwa yoh boon Run deiwa dat 31 Run na ki 24 bol, pynbood won da u Phiner Tang wa u Deimiki Rabon kiwa da yoh mar 17 Run samen. Na kiwa kawang bol ka Lion Y&SA, u Deibormi Rngad wa u Teilang War da yoh ki u pynhaap mar 4 Wicket.
Yei naam Man of the Match da yoh da u Teilang War uwa yalehke ka Lion Y&SA.
Ka yalehke Quarter Final wa khaddooh toh ha ka 31 tarik hapyrdi ka The Legends (Lissi Pearl) pyrchah ya ka Wahiajer SC ha Khliehtyrchi Mini Stadium, heipor 9:00 waje i step.
Ya ka Digital Live Score yong kani ka League ye phi u pait ha https://cricheroes.com/tournament/1881561/wjhdca-district-cricket-league-2026/matches/live-matches.
Discussion about this post