Ka Synjuk Waheh Chnong Ri Jaiñtia ha ka 4 tarik uni u bnai hei yahkhmat u President Rangbah yong ka, u Arminius Lipon da lai dawa wei pynsñiaw ko ha u Montri Rangbah ka sorkar Meghalaya, u Conrad K Sangma yow pynkrehkaam noh chisiendon ya ki 4 tylli ki mat wa thrang yong ki khon ka Ri Jaiñtia.
Kawa nyngong ka mat toh iwa da wanrah da u Mutshwa Thabah, President Thadlaskein Block Unit hajrong ka phang wa ka sorkar u phah wei u e laad ko ya ka JHADC wow chna wei pynskem noh deiwa tikna ya ka aiñ yow khanglaad ya ki mynder lane ki wym toh ki tre ri wow yoh ya ka Schedule Tribe Certificate kamjooh leh u khanglaad u yoh u thap Vote wei wow yaleh ki ya ka Election MDC hapoh ka JHADC yow lait u chah ktah i chongsuk chongsaaiñ ka roi ka paar ki para ri wa ki jaitbru Jaiñtia waroh chirta.
Ka mat wa ar toh heiyatoh wa i pynkut noh ya ka MGNREGA wei wow pynkrehkaam noh da ka VB-GRAM G, da ka sorkar pyrdi deiwa dawa wow su pyndep chwa waroh kiwa dang sahteiñ nadooh ki bai tiar wa bai kreh yow ye u pdiang ya kani ka Scheme wa thymme. Ya kani ka mat da pynsñiaw da u Arsuk Tyngkra, General Secretary, Thadlaskein Block Unit.
Ka mat wa le won toh neibynta i chem chitom ki paidbah wa em chnong ha khappood, khamtam ya kiwa chong ha khappood wa ka Assam kam ka chnong Lapangap, Mukroh, Khanduli wa kiwi.
Ya kani ka mat da klam da u Damian War uwa man kam u Adviser ka Namdong Block Unit ka Synjuk Waheh Chnong Ri Jaiñtia heiwa da pynsñiaw u ya chiboon i eh i khoo wa maad ki warep ka chnong Lapangap kiwa da dooh u lai rep cha ki lyngkha yong ki na ki daw wa khanglaad ki pulit Assam deiwa dawa u wow pynbait chwa yei klam ya u pood u ang.
Da dawa na u Montri Rangbah wow chna laad katwa ye yow yoh ki warep u rep deiwa suk wei wow pynbiang ki pulit wow yada ya kiwa chong chnong ka Lapangap.
Ka mat wa soo toh neibynta i eh wa da maad kattu la kamwa 12 snem hadien wa ka Supreme Court da khang ko wow tih mooyong da ka Rat-Hole Mining wei da chah du ya kiwa em næ yoh Licencse wa kiwa da Register ha ka aiñ katkam ka juk thymme namo ka Scientific Mining heiwa ym yoh de u toh mooyong dei rukom wa nachwa.
Da ong leh wa em chiboon iwa chah ktah wei dooh nong ya kiwa chong chnong ha ka thaaiñ hapoh ka East Jaiñtia Hills District wa da em boon ki manyung kiwa da chem chitom u im kam nachwa, wot ya ka kaam lai skur ki khon leh da hap u pynsangeh wei chem chitom leh ha ka baam ka dih wa ka dawai dupon kawa emkaam u pynbiang hei im bru heiwa deiwa dooh khih da mih ki kaam tooh kaam kaam lute. Chooh chooh da ong wa hanla ka sorkar da e laad ko u kreh mooyong wow bood ryntih da ka aiñ dei stat Science tangwa ym pu biang wei ym pu ye u pynyooh laad ya waroh na kiwa boon ki daw.
Kamtæ da kyrpaad ya u Montri Rangbah wa ya ka sorkar da u Joint Secretary ka East Jaiñtia Synjuk Waheh Chnong, u Deibor Suchiang, uwa da sñiawkhia bha yeini i chem chitom ki paidbah wa chong chnong hapoh ka East Jaiñtia hi waroh kawi.
Da booh u leh i kyrpaad wa joor yow thoohlaad ka sorkar u chah u khih mooyong kamwa jooh khih deiwa bood ki rukom wa nachwa deiwa bood ryntih hi leh wa ka aiñ thymme næ Scientific Mining.
Da kyntu leh wow e laad u yoh u khih u kreh nadooh kiwa khian wa nai haduh ki waheh wakhroo kamwa jooh khnang yow ye u wanrah biang yei yoh i kot ki paidbah wa chnong chnong wa ya ka sorkar hi leh kamjooh.
Ya ka dorkhat da e da u President waheh dooh yong ka synjuk deiwa emlang ki dkhot na waroh ki Block Unit.
Discussion about this post