Ka Jaiñtia Students’ Union, Jowai Circle, hei yahkhmat u President, u Born Rupon wa u General Secretary, u Rio Pyrtuh wa ki kattu katni ngut ki dkhot, da lai yachem ki wa ka Chief Postmaster ka Jowai Post Office hajrong i pynbaad kiwa boon ki paidbah chaphang i rukom man wei khlem akor kiwa kreh hawa wan ki paidbah u phah næ u chim ya ki mar yong ki.
Ha i yachem wa ka Post Master, ka seiñ da kdaw che ko wa i ini i rukom man kiwa kreh da tyngkheiñ ki ya ka aiñ Post Office Act, 2023 wa ka Post Office Rules, 2024, heiwa da dawa wa kiwa kreh toh u pynyoo burom wei toh u sumaar bha ki ya ki mar (Parcel) yong ki paidbah khlem da em i pynwit næ pynthut ya ki.
Ka Chief Postmaster da pdiang ko yeini wei da mynjur ko leh wow chimkhia heiyatoh u pynbait yeini i man i long næ i rukom krehkaam ka Office.
Da kular ko leh wow pynyoo pynkdaw che yei rukom chirup ki kyndon hajrong ki tiar wa phah ki bru wei yeini u thoh dei ktien Khasi næ ktien Pnar neibhah boon ki paidbah na ki thaaiñ palatsor ki wym sñiawthooh Hindi næ English wei deiwa leh kamni daw man ko iwa miat ya ki paidbah waroh hi.
Ka seiñ da pynche ko wa ini i yachem man ko kawa mihsoh wei u pteiñ ko u chakri u pait neibynta i bha i miat ka imlang sahlang yow pynneh yei hok yei burom yong ki paidbah. Wei lada ym em i pynbait da iwa biang, daw chim da ki luti yow pynneh yei hok ki paidbah deiwa em i kitkhlieh neibynta i bha i miat yong ka imlang sahlang.
Discussion about this post