I yoh psiah Top-20 ka Sawlyngdoh Higher Secondary School Mowkaiaw, West Jaiñtia Hills District haka sien wa ar yong ka Result SSLC ka MBOSE itæ ha u snem 2021 wei ha uni u snem 2026 toh lyngba ki ar ngut ki chipayu tre, kiwa chong wa sah ha chnong Mowkaiaw hi, kitæ u Wanteibok Pator uwa da yoh hei kyrdan 2nd Position ha u snem 2021 wei ha uni u snem 2026 won ka diah khian yong oo ka Jenita Pator kawa da yoh hei kyrdan 5th Position.
Kini ki arngut chipayu toh ki khon u Deibormi Sten wa ka Bary Pator kawa man leh kawa sikai ha kani ka skur Sawlyngdoh heiwa katni da man ko kam ka Principal.
Kamtæ hajrong i yoh psiah Top-20 biang ka skur ha uni u snem, neiliang ka skur chirup ka Meghalaya Pensioners Association, Jaiñtia Hills Branch ynne ka sngi da pynkup burom ki ya ka Jenita Pator haka yalang wa pynlai da u C. Nongrum ha pchem ka skur, chirup i emlang kiwa sikai, ki dkhot SMC wa ki khynnah skur.
Uwa sikai, u Umesh Singh hawa khana hajrong i yoo u ya ka Jenita kam ka khynnah skur, ong u wym poi pyrkhat u wa ka khynnah ka wym jooh boonktien wei kawa sñiawsuk u chnong chadien dooh ki ben hapoh kamra Class u poi ko hadooh kani ka kyrdan.
Kyntu haroh u ya kiwi ki khynnah kani ka skur u bood ki ya ka nongmuma wa bha yong ka khnang wa ki leh u tyrchaaiñ ki.
“I poi ka Jenita ha kani ka kyrdan pynsakhiat ko wa ki khynnah wa puræ ha ki skur wa em cha palatsor leh ymtoh de kiwa sahdien, hanla em chiboon i wym biang hawa wyrchaw wa ki skur wa em ha sor,” da ong u Umesh Singh.
Ka Principal yong ka skur kawa man leh ka bei yong ka Jenita Pator hawa klam ong ko, “Ha u snem 2015 ka khon nyngkong yong nga na kani hi ka skur dooh ko u psiah Top-20 deiwa duna 5 Marks, hanla em i sñiaw diaw leh, tangwa da yang bait i wei ha u snem 2021 u khon wa soo yong nga da rah naam u ya kani ka skur, deiwa yoh hei kyrdan 2nd Position, wei ha katai ka por ka skur ym em yohlaad ko u lehkmen katwa toh ka por Lockdown”.
Kamtæ sñiawngooh ko yow Blai wym em ieh u ya kani ka skur heiwa ha kani ka kynti sa ka khon khaddooh yong ka leh yoh ko haka 5th Position, kawa da man i kmen wa khroo yaka skur u pynman leh da i pynkup burom ya ka.
Ka Jenita Pator hawa klam da e khublei ko ya kiwa sikai kiwa ha-yung ha-sem, kamjooh ki para khynnah skur wa toh lyngba i emlang chirup wei kyrchaan yong ki tæ poi ki cha kani ka thong.
Sñiawkmen ko wa ini i pynkup burom toh i e mynsiem ya ka hei lai luti wa chaphrang yow em ka thong wa rap cha khlieh wei wow lehbha chooh chooh.
Da ban joor ko hajrong i emkaam u man kiwa pyrchang neibhah lada waroh man iwa suk, ymtip næ sñiawthooh yei bor wa ye, tangwa hawa tyngkhooh chiboon i eh i khoo ye i wow rap lehbha.
“I pyrchang yarap ko yow nang ku, wei khlem i pyrchang ym em i ku næ ye u poi bha cha ka thong,” da ong ka Jenita.
Ong haroh ko, “Hei pyrchang ym ye u jop khlem i chah rem næ i eh i khoo, man ko leh i lai luti wa yarap yow rap ye u lehbha ya idæ”.
Chooh chooh pynrap ko deiwa ong waroh ki bru wa poi cha ka thong wa cha khlieh ym poi ki khlem i pyrchang chwa, toh i pyrchang wa yarap u pynhoi bru.
Heijooh i por kyntu ko ymtoh u tieñ yei chah rem næ man kiwa sarom. Wei yow jop hi toh u man kiwa kreh chitom, kiwa raikut wei em i chimkhia.
Neitæ ong ko wa emkaam u em yei yumut i pyrkhat wa rap phær, wei wow man kiwa yaichah ha kawon kawon ka bynta.
Kiwi won wa klam kyntu kynpham ki ya ka Jenita kamjooh leh ya kiwi ki khynnah skur u bood ki ya ka nongmuma yong ka wa kynthup ya u Vice President ka Meghalaya Pensioners Association, Jaiñtia Hills Branch, u W. Lyngdoh, ki dkhot SMC u Heipormi Laloo wa kiwi.
Discussion about this post