Ha ka 17 tarik uni u bnai, ka Tep Kyndait Government U.P. School, Tuber Kmaichnong da sdang ko ya ka e sikai wa le bnai neibynta ki khynnah kynthai ka skur, kawa da e pyrtuid ka Self Defense Training for Girls.
Hachwa u sdang ka Training, da em ka yalang wa tbian wa pynlai da u Pynshngaiñ Phawa, Assistant Teacher ka skur. I klam na u Ribait Oo Pde kam u Instructor uwa wan neibynta ka West Jaiñtia Hills Karate Do Association, deiwa yahlang haroh u ar ngut ki khynnah (Student) yong oo na Jowai.
U Headmaster ka skur, u Riquoma Rq. Laloo hei klam yong oo da batai u heiyatoh waka Training, deiwa ong wa kani toh kawa da sdang da ka sorkar pyrdi neibynta ki khynnah skur kynthai nadooh Class 6 hadooh Class 12, heiwa ka sorkar jylla won da ksohktilang ko deiwa phah cha ki skur yong ka wow pynkrehkaam.
Da batai haroh u yei naam ka Lakshmi Bai kawa da kha ha u snem 1827 wei da khlaad ko ha u snem 1858 kawa man ka dap kynthai wa chlur wow yaleh pyrchah wa ka sorkar pharæng ha kitu ki por. Da man ko leh kawi na ki Freedom Fighter kawa da yoh naam kam ka Queen of Jhansi næ ka Rani of Jhansi. Kamtæ ka sorkar India da booh ko ya kani na ki Scheme hei pyrtuid yong ka kam ka Rani Lakshmi Bai Atma Raksha Pratiksha, kawa ki khynnah skur kynthai toh u yoh ki ya ka Self Defense weiwa toh u em sakhiat ki yeitæ i mynsien wa chlur kam ka Lakshmi Bai.
Da e yaroh haroh u ya ka sorkar Meghalaya wa da chimkhia ko ya kani wow man kam kawi na ka Co-Curricular Activity yong ka skur, hanla man ko du le bnai donhi leh, ki khynnah skur toh u man won ki kiwa pyrchang man-ka-sngi, kamtæ da kyntu haroh u ya ka sorkar wow boh da uwa sikai wa pura wow leh yeini.
Discussion about this post