Ka Village Health Council (VHC) Ialong chirup i ya krehlang wa ka Dorbar Chnong Ialong da pynsñiaw ki yei sñiawngooh ya ka sorkar Meghalaya wa yahkhmat da u Conrad K Sangma khamtam ya u Wailadmiki Shylla uwa man leh u Montri ka chnat i chait i khiah wa da yarap pynyoh ya ka Scheme thymme na ka sorkar Meghalaya hei pait bniah ka District Medical & Health Officer ka West Jaiñtia Hills District heiwa da pynyoh ya ka poisa wa Rs. 55,50,000 wei da yoh u pynyieñ ya ki chrot neibynta u pynchna noh ya ka Ialong Sub-Centre wei wow pyndep smat ya ka khnang yow yoh myntoi ki khon yong ka chnong Ialong kamjooh ki para marjan chnong.
Kani ka Hospital khian kawa man leh ka yong ki manbei wa neibynta kiwa punkhon kamjooh ka thaw pynkha khon, daw pynsuk bha ko chiboon ya ki paidbah hapoh yong ka chnong Ialong kamjooh ya ki para marjan chnong neibhah daw krehkaam ko 24×7 iwa daw pynsuk heipor wa emkaam yei sumaar wei yarap wa jhan.
Ha kani ka thaw sumaar daw emlang leh ki OPD Room, ki Labour Room wa kiwi tawon nadooh ki Medical Room, ki Rest Room kamjooh ki thaw sah (Quarter) kiwa sumaar.
Ka VHC Ialong wa khlieh da u T. Ram Phawa uwa man leh u Waheh Chnong ka Ialong chirup wa u General Secretary Chnong, u Masan War, u Chairman Chnong, u Mih Salan Dhar wa ka Secretary yong ka VHC, ka Sngi Dhar deilang i synranlang ki dkhot yong ki ar Committee nadooh ka VHC Ialong wa ka Dorbar Chnong Ialong, hawa klam ynnin ka sngi hawa pynyieñ chrot kani ka Sub-Centre, da e khublei kyrpang ya u Wailadmiki Shylla wa da theh u ya chiboon bah ki Scheme pynroi hapoh ka chnong Ialong ki wym ye de u kheiñ nadooh neibynta iwa emkaam ha ki skur, ki sarok, ki Scheme samen, ki Scheme Sport, ki Scheme Tourism wa kiwi kiwi de ki jait Scheme ki wym ye de u khana.
U waheh chnong da ong u wa pyn ha kani hi ka jooh ka thaw sumaar daw em leh ki laad ya ki khynroo khyllood ka chnong wow yoh kaam yoh jaam katkam wa yahaap i puræ puthi yong ki kamjooh ya kiwa kamai sngi nadooh ki Local Taxi hadooh ki dukan dukdoh wa kiwi de ki jait kaam.
Da ong u leh wa ka chnong Ialong man ko kawa embhah tam wow yoh ya kiwa mihkhmat nadooh uwa mihkhmat uwa da baam kwai ha dwar u Blai uwa da theh chiboon bah ki kaam pynroi hadooh uwa mihkhmat uwa katni u wa chynna jngai yei emkaam yong ka chnong uwa man leh uwa kai-it bha i mynsien yong oo wow pynku ya ki chnong kiwa em ha ki thaw wa palatsor yow ya ryngkat i yoh i kot kam kiwi ki chnong kiwa em ha khapsor. Da ong chooh chooh u wa kani ka sorkar MDA kawa katni man sakhiat ko kawa kreh chitom wow pynku u kynrong ya ka roi ka paar lada ya nujor wa ka sorkar ka warim kawa dap chiboon bah i duna hawah haneiñ hawa chim ya ka yukheiñ.
Discussion about this post