Da: U Shimphang Lyngdoh, Lumputhoi EJH
Kat chawa lai wa wan kat chawa yoo,
Sa du ki jhep bait wa em chapoh khloo;
Iyi cha wa em ha jabieñ yong i ki bru?
Næ wym kwah i ya ka chnong wow ku.
Da kiwa stat leh da ak biej ki katni,
Wym bien sakhiat ki u ya ksohkti;
Yoh u pyndooh pyndam yeini waroh,
Kiwa ya ong “La i ki Jaboh ki Jaboh”.
Aa ka Bei Rymaw kammon ini kattu!
I daw waroh toh mih ki na i hi ki bru,
Da leh pap leh sang ya ka Bei Mariang;
Su ki jakhlia wa dap cha timun tidiang.
Da khlot i ki bru hajrong wa sñiaw,
Da thlah ki khmat u pait cha kyndaw;
Wym em sarom maraiñ de u bru pyrthai,
Wei wym kheiñkor de i yeiwa da e kyrpang u Blai.
Manbru katni su kiwa khlem pyrkhat,
Wym bien de i u syndong u antaad;
Su i choon i dusmon ya ka bei wa psa,
Kat nang pait kattæ mynsien nang takha.
I burom ka Bei Rymaw wym ye de u su,
Da-lei da-lei katwa pyrchang u ngam yillu;
Chisien hi wada pynjæd yei doh i pran yong ka,
Da-eh da-eh ko ya i wow pynmiat pynbha.
Aa Kynrad wa booh ma yoh o deiwa ong,
Kat ya pha Bei Rymaw nga u lana u syndong;
Na pha chkeh lut i ki bru lak phaw jait,
Pyndap pynbiang pho ya i khlem kyntait.
Lada toh i ki bru wa em yei sñiaw ya ka,
Chim yei kitkhlieh jar i yong phi yong nga;
Ham khiar ham dusmon hadooh kat deini,
Ya boi u dooh yanom i ki chisien ka sngi.
I pynsñiawthooh paidbah na ki chnat sorkar,
Kylleiñ kylleiñ ki thaw la waroh da paar;
Ki seiñ kreh mon sñiawbha wa ki bru chimet,
Yei kyntu kynpham yong ki duhai ham lyndet.
Ki bru paidbah wa ki khynnah skur,
To em ya ka thong da kawi ka sur;
Wow pynmiat pynbha ya ka Rymaw,
Yoh u neh u sah ka Bri ka Khyndaw.
To ya krehlang i chirup dang kattæ wot,
Yoh u lait nei chah tim ha kiwa mynried;
Lada nga wa phi pynyoo luti i yeiwa bha,
Ka pateiñ wa mynried suk ki u bood nuksa.
Discussion about this post