Ka Voice of the People Party (VPP) ha ka yalang paidbah wa da pynman ynnin ha Motphran, Shillong, neiliang u President yong ka u Ardent M Basaiawmoit da dawa wow man iwa khooid wa suba ki kreh ha ki Project waheh ka sorkar heiwa da kylli u leh uyi oo utæ u Badri Rai uwa man kam u Contractor.
U Ardent da ong u wa i tip yei tre uni u Badri Rai man ko iwa emkaam ware bar yei thmu ka sorkar wow lai phah bru cha baar ri yow chem yei thied ki Khasi, Jaiñtia wa Garo.
Da kylli u leh kammon uni u Badri Rai oo bait wa yoh ya ki kreh wa boon hapoh ka jylla nadooh i chna ya ki Eklavya Model Residential School ha thaaiñ Sohryngkham wa Mawsynram.
Da pynkynmoo u wa chisien kawi ka kari kawa emyatoh wa u Rai da chah kem ko neidaw wa rah poisa chiboon heipor wa lai yalap Election ka NPP ha Arunachal Pradesh.
Hadien wa poor kani ka khubor, neiliang ka Badri Rai & Company (BRC) kawa da pynmih pyrtuid u Ardent da e ko yei jubab yeiwa chah kawang ktieh i pyrtuid da boonsien ha kiwa boon ki Party deiwa ong wa ini toh du nei wym ya sñiawthooh yei kreh ko iwa da yarap ya ka Meghalaya.
Da ong leh wa ka BRC toh ka Company kawa na Dibrugarh kawa da yaleh wow yakhun kreh wa kiwi ki Company waheh hapoh ka ri wa hapoh ka thaaiñ.
Chooh chooh da ong wa manda em ka Company kawa na Northeast kawa ye u kreh ya ki Project waheh, da pynphylla ko ya kiwa boon wot ya kitu ki Company wa da bna naam hapoh ka ri.
Kamtæ da ong wa toh u sñiawsarong wa ye wow pynyoh kreh da ki tre chnong wei kamjooh kitu kiwa da biang ka puræ puthi yow yoh ki wow pynyoo yei sap yong ki heiwa boon na ki da yoh ki wow man kam kiwa yahkhmat hawa nachwa ym jooh yohlaad ki.
Ka BRC da pynche ko leh wa ha kini ki 3 snem, da yoh ko 4 tylli ki Project waheh ha Meghalaya deiwa yaleh Tender wa kiwi ki Company waheh ka ri wei da jop ya ka Tender deiwa booh yei dor duna hadooh Rs. 170 klur khlem da ktah yei kreh wa leh.
Da e nongmuna leh ya i kreh ya ka Secretariat ha New Shillong heiwa da ye ki wow pynduna da 15% neiwa booh dor kiwi ki Company kiwa na Kolkata wa Hyderabad.
Da kdaw leh wa waroh ki kreh toh kiwa lai bait wei kiwa daw pyndep heipor wa da booh deiwa pynrap wa kiwa boon hi ki kreh ha Meghalaya toh kiwa yoh da ki Company waheh wa em hapoh ka ri.
Kamtæ da ong wa i bhah wa yoh ki toh iwa khian bha ha Meghalaya neibhah kiwa boon lai ki cha ki Company ki Firm waheh hapoh ka ri.
Da khana leh wa ya kani ka BRC da seiñ ha Dibrugarh ha u snem 1970 wei da krehkaam ko ha ki 9 tylli ki jylla wei ha Meghalaya da yoh ka mar kawi ka Project hapoh ka chnat Urban Affairs, Tourism, IT wa Education.
Da kdaw leh wa lada i kreh man ki kiwa khian, neiliang ka BRC ym jooh yaknieh ko yow e laad ya ki Contractor wa khian wa em hapoh ka jylla yow yoh kreh ki.
Hapoh kani ka Company da em leh 50 ngut ki Khasi kiwa kreh nadooh kam ki Project Manager wa kiwa kreh hapoh Office.
Discussion about this post