U Saiñkupar Nongtraw uwa man kam u General Secretary ka HNLC da ong u wa kani ka “ARMEX-1 2026” Air Raid Mock Drill wa da pynman ha kylleiñ ka Meghalaya da pynyoo ko yeiwa ar sap ka sorkar India heiyatoh wow yada ya ka ri heiwa ki paidbah da phah ya ki wow tympleh ki ya bordiñ kam wow pynkhreh yei wan ki lieñsuiñ wa dat Bomb tangwa kani hi ka jooh ka sorkar kawa pteiñ wow em ki ktem chipai hapoh ki chnong ki thaw ki paidbah kam ha Laitkor wa kiwi de ki thaw.
Da ong wa ka Headquarter ka Indian Air Force kawa man ka Eastern Air Command da pteiñ ko wow em ha Upper Shillong wei man ko leh kawa emkaam bha na ki 5 tylli ki Air Command ka India.
“Ka Shillong Cantonment, HQ 101 Area wa ka Military Hospital da pynyoo leh yei boon i em ki chipai hapoh ka sor deilang ka Umroi Military Station wa kiwi de ki thaw yow pynman ya ki International Joint Military Exercises kam ka Exercise Maitree,” da ong u Saiñkurpar.
Ka HNLC da kyntu ko ya ka sorkar jylla deilang ki Autonomous District Council wa kawi pa kawi ka Dorbar Chnong wym toh wow e wai yei thaw cha ki chipai ha kiwon kiwon ki rukom wei wow pynheh ki yeiwa da em chwa ki neibhah lada leh kamni daw man ka Bri U Ynñiawtrep kam ka thaw yaleh thma manda em ka thma.
“Deiwa em ki ktem ki chipai daw mang da kiwi ya ka Ynñiawtrep manda em ka thma,” da ong u Saiñkupar.
Chooh chooh da ong wa ki ktem ki chipai ymtoh u em ki ha ki thaw wa em ki chnong paidbah wei lada chimkhia yei mynsien ki paidbah ym booh ya ki chipai ha ki thaw ki chnong ki paidbah.
Discussion about this post