Ka Behdieñkhlam ka Raij Kongwasan Chyrmang kawa man kawa nyngkong dooh man-u-snem hapoh Ri-loom Jaiñtia, da pynkut ka ynne ka sngi hapoh ka Syiem Aitnar.
Ha kani ka sngi pynkut wa da pynman ha Aitnar yong ka chnong Chyrmang, u Montri ka sorkar jylla uwa man leh u MLA ka thaaiñ, u Lahkmen Rymbui da wan sakhi u kam u kongsan hei emlang u Dolloi ka Elaka Jowai, u Puramon Kynjing, kiwa yahkhmat wa ki bru mihkhmat na ki Raij waphær waphær deilang kiwa chah khut sñiawbha wa kiwi.
I lehniam ha kani ka sngi pynkut da sdang i nadooh i por step dei lai chaad kut thlu yung wei bood sei lai chaad ha yung Langdoh da ka Chyrmang Neiñ, ka Chyrmang Wah wa i seh Bhang.
Heipor noh chariñ ka sngi won ki khon ka Raij da wanrah ki ya 7 tylli ki Rong ki Rot ha Aitnar dei chaad kmen wei kyriaw deiwa chimbynta kynthai wa chynrang ha deilang i sur yong ki bom, ki bhuri wa ka bikur. Kini ki chnong kynthup ki ya ka Chyrmang Wah, Chyrmang Neiñ, Chyrmang Loomboohja, Iongnoh wa kiwi.
Da pynman leh ya ka yalang wa tbian heiwa da yoh i klam na u Wol Shylla uwa man u President ka Seiñraij Chyrmang uwa da ong wa katkam wa man hi hapoh ka Raij da sdang ya ka lehniam nadooh ka 14 tarik uni u Bnai deiwa pyndep ya ka Kñia Ryngkaw, Kñia Duwan wa waroh ki 30 Ryngkaw.
Da khana u leh wa hadien wa noh ya ki rong ha Aitnar, hei janmiet nawon ka sngi daw pyndep ya ka Kñia Khang wow khang wow beh ya ka khlam ka kjut.
U Lahkmen hawa klam da e khublei Behdieñkhlam u ya waroh ki khon ka Raij wei kyrmen u leh wa u Trekirot wow kyrkhu u ya waroh ki khon ka Raij deiwa kyntu wa emkaam yei chongsuk kamjooh leh i yatylli.
Discussion about this post