Hadien wa chem ya ki tadong pynlang snaam du kamwa 2 meter na ka wah Myntdu hajan ka Damser ha ka 30 tarik u April, pyn ha ka sngi wa bood da wan ki bru ka Meghalaya State Pollution Control Board wow takit yeini deiwa emlang ki bru ka Jowai Municipal Board.
Neiliang u President ka Khooid Ya Ka Myntdu, u Khroo Lamsalanki Pariat da ong u wa ini da yoo lakam wa da yap i sñiaw ki bru katni neibynta kani ka wah.
Da ong u leh wa ini ymtoh i sien wan nyngkong wa jia kamni wei da embhah wa i snaam wa em ha kini ki tadong ym pu em yoh wow kai ki cha ka wah neibhah ye ko ktah joor neibhah ka PHE da saam umkor ko cha kiwa chong chnong ka chnong Jowai da ka um na kani ka wah.
Da kyntu u leh ya kiwa leh yeini wow em yei kitkhlieh wow wan chakhmat wow pyntip yeini neibhah da em kiwa suba wei ha kini ki sngi wow wan lada chem lada leh da ki Hospital næ ki Laboratory heiwa ka pynchitom ye ko wow man hadooh wow khang ya kini ki thaw najrong wow chong ki hapoh patok.
Da yooluti u leh wa ini wym jia de i neini chakhmat deiwa chna kini ki thaw wa leh yeini ya ki thaw pynlang ya ki Bio Chemical Waste.
Da kyntu leh ya kiwa wan sait that ha kani ka thaw wym toh u noh yei ait, ki yusleiñ, ki Sanitary Pads neibhah wa ktah ko ya waroh deiwa kyntu leh ya ki bor District chirup wa u MLA ka Jowai wow thooh thaw sait that yow ye wow pynlang yei jakhlia.
Neiliang ka Jowai Municipal Board da wan ki wow pynlang ya ini i jakhlia deiwa lai noh cha ki thaw noh ya ki Bio Chemical Waste.
Discussion about this post