I ka’it wow chna Reel neibynta ka Social Media dapoi chei jia wa sñiawsih ha Siddharthnagar District ka Uttar Pradesh hadien wa 5 ngut ki khynnah da ku ki ha ka Top umkor tangwa da haap noh uwi.
Ar ngut na kini ki san ngut da sahkut ki hajrong ka Top heiwa da hap paan yarap na ka Indian Air Force wow pynlait ya ki hadien 16 kynta.
Ka Central Air Command yong ka Indian Air Force da phah ko ya ka Mi-17 V5 Helicopter hadien wa paan yarap ki bor sorkar wei dapoi ko ha Kanshiram Awasiy Colony ynne i step heipor 5:20 wei da ye ko wow pynlait ya ki ar ngut du hapoh 15 minit wei da kit noh ya ki cha Gorakhpur.
Ha ini i pynlait ya ki ar ngut da sakhi da u District Magistrate, u Additional District Magistrate, u Additional Superintendent of Police, SDM wa CO Sadar.
Ka IAF da ong ko wa kini ki ar ngut da sahkut ki hajrong ka Top palat 16 kynta hadien wa tkut ka yingkieñ.
Neiliang ka NDRF da pyrchang ki wow pynlait ya ki khynnah tangwa nei joor u slap da pynthut u yeini hadooh wa hap paan yarap na ka Air Force.
Kini ki san ngut ki khynnah da ku ki hajrong ka Top heipor 1:00 waje i sngi ha ka 2 tarik wow chna ya ka Social Media Reel. Katwa dang hiar ki, ka yingkieñ da tkut noh ko wei le ngut da haap ki chapoh.
Ha ini i haap, uwi na ki khynnah, u Siddharth da yap noh u katwa ki ar ngut won u Shani wa u Golu da mynsoo ki wei da kit ya ki cha Madhav Prasad Tripathi Medical College.
Ki ar ngut won wa sahkut kynthup ki ya u Pawan wa u Kallu, wei da neh ki hajrong ka Top chi miet.
Discussion about this post