Ka Dorbar Chnong Lapangap ha ka 5 tarik da rai ko wow pynsangeh chwa yei thmu wow toor cha Secretariat kawa da booh wow pynman ynne ka 6 tarik deiwa leh da ka Peace Rally.
I rai wow pyndam toh hadien wa i yaklam yasuk kawa da pynman ha ka 5 tarik heiwa da man ko kawa mihsoh deiwa chimkhia u DC ka West Jaiñtia Hills wa ka DC yong ka Karbi Anglong kawa da pynman ha chnong Khanduli.
I pynman ya ka yalang da ki ar District toh yow wanrah ya kiwa yahkhmat chnong ka Tahpat wa Lapangap yow poi ki cha ka miej yaklam yasuk hajrong ki kynrum kynram wa jia ha khappood nadooh ynnin u snem.
Katkam wa khana u Waheh Chnong ka Lapangap, ka yalang toh kawa lai bait khlem iwon iwon i ya kawang ktieh. Da khana u wa neiliang kiwa yahkhmat yong ki Karbi da paan por ki 2 sngi yow lai pyntip cha ki paidbah wa chong chnong yei rai wa mih na kani ka yalang, heiwa da pynsñiaw u yei kyrmen wa hadien ka 2 sngi manda ki Karbi da e ki dei thoh, ki warep ka chnong Lapangap daw yoh ki wow lai rep deiwa suk cha ki lyngkha kamwa jooh man.
Ha kani ka yalang da em i dawa neiliang ki Karbi wow pynsakhiat yeiwa kem ya kiwa suba emkti pynyap ya uwi u nong Karbi uwa tip pyrtuid kam u Oriwel Timung, wei hajrong ini neiliang u SP ka West Jaiñtia Hills da pynche u wa daw leh yeiwa emkaam deiwa ya krehlang wa u SP na West Karbi Anglong yow phah dei thoh cha kitai kiwa yahkhmat.
Ha kani ka yalang da emlang leh wa kiwa yahkhmat chnong na waroh arliang, u President ka AMKA, u General Secretary ka HFU deilang wa u President ka KSA Hamren, West Karbi Anglong.
Discussion about this post