Ka Pnar Student Movement (PSM), Central Executive Committee, hapoh i yahkhmat u President, u Embhah Passah da ujor ko ha u Deputy Commissioner ka East Jaiñtia Hills District wa cha ka MSPCB kamjooh ha ka Secretary ka JHADC neibynta wow pyndam ya ka Public Hearing kawa da khut da ka Meghalaya State Pollution Control Board (MSPCB) ha ka 22 tarik uni u bnai neibynta wow tih moochuni ka kharkhana khyndaw-bilat ka M/S Shree Cement Ltd ha Lum Syrman ha i thaw wa heh 217.394 Hectare.
Ka seiñ da ban joor ko wa ymhoi u e ya ka NOC neibynta kani ka karkhana wa thmu wow lehbor pyrchah yei hok ki paidbah.
Kamtæ ka seiñ da dawa ko wow pynsangeh noh ya kani ka Public Hearing neibynta wow lait nei chah ktah kiwa rep wa riang, ki um ki wah, ki hali pynthor, ki deiñ ki siej wa ki mrad wa im ha khloo.
Ka seiñ da ong ko wa i wan kani ka karkhana ym myntoi ko ya ki paidbah wa boon wa lang, la kheiñ ha i yoh kreh, næ i roi i paar heiwa boonsien dap du i pynsih ya ka rymaw wei i chah ktah i chait i khiah ki paidbah.
Heiyatoh wa ka Public Hearing ka seiñ da e ko ya i kyrchaan wei krehlang wa ki tre thaw wa ki warep kiwa chaniah ha i rep i riang ha kini ki thaw wei ka seiñ da maham ko lada jia wa kani ka karkhana lehbor ko ya i hok ki jaitbru na ka thaaiñ, ka seiñ daw mih ko chakhmat deiwa khor neibynta wow yoh ki paidbah yei hok yong ki wot hadooh wow lai cha High Court wa cha ka NGT.
Discussion about this post