Ka sorkar Meghalaya ynne da ong ko wa neidaw wa joor ware boon ki krem mooyong hapoh ka jylla khamtam ha East Jaiñtia Hills da man ko iwa eh bha wow pait u chem ya kiwa tih mooyong pyrchah aiñ.
Neiliang u Montri Rangbah, u Conrad K Sangma da ong u wa ka sorkar da pynkreh ko kat iwa da phah ka yung bichaar wei da pynchitom leh ya kiwa tih mooyong pyrchah aiñ.
Da kdaw u leh wa katkam ka Report ka Committee wa khlieh da u Justice BP Katakey, ha kani leh da kdaw wa em kamwa 22,000 tylli ki krem mooyong du ha East Jaiñtia Hills donhi.
Da ong u wa neidaw wa joor ware boon kini da man iwa eh ya ki bor sorkar wow pait yeini khlem da sangeh.
“Lada ya ki 5,000 hadooh 6,000 tylli ki thaw da pait ki heijooh i por, ki hajar tylli kiwi won da ieh khlem da em wa pait,” da ong u Conrad.
Da ong u leh wa em ki thaw tih moyoong kiwa da wan pait ki bor ka aiñ tangwa ha kini ki jooh ki thaw da pteiñ biang u tih hadien wa lai pait won cha kiwi ki thaw iwa da pynman ya ki bor sorkar wow chem chitom wow pait ya waroh.
Discussion about this post