U Deputy Chief Minister ka Meghalaya, u Prestone Tynsong ynne da ong u wa ka Khasi Hills Autonomous District Council ye ko wow bakla lada lai ko pyrchah yeiwa rai ki heh ki Hima.
Hawa yaklam wa kiwa thoh khubor, u Prestone da ong u wa ka KHADC ymtoh u lai ko pyrchah yeiwa da chim rai ki Hima wa ki Raij neibhah kini da lai ki katkam ka riti dustur yong ki kiwa da bood nadooh ki por yong rim.
Da ong u wa katkam wa da yoo wa kiwa chong chnong ka Hima Sohra da lai toor ki cha ka KHADC deiwa ong ki wa ka Council ym tip ko wow burom yei rai ka Hima wow thung Syiem.
Katkam iwa ong u Prestone, ka KHADC da chah pynbaad ko wym em tipmit næ thung ko ya u bru wa da jied wei ym tip che u yei daw wa leh ka Council yeini.
Hajrong ini da ong u wa lada pait bniah, da man ko iwa bakla ya ka KHADC wow lai pyrchah yei rai kawon kawon ka Hima, Raij næ ka Elaka. Wei ka Council hap ko wow piat bniah wym leh heitæ i rukom wa i rukom synchaar tynre ym man ko kawa chah luchia.
Kam wow pynkynmoo wa ynne ki dkhot ka Hima Sohra da lai toor ki cha ka yung krehkaam ka KHADC wow dawa e Sanad ya u Marremdor Syiem kam u Syeim ka Hima Sohra.
Discussion about this post