U bru uwa 27 snem i rta dapoi u cha ka Sion Hospital, Mumbai deilang wa ka wait ha khlieh heiwa kiwa ha-yung ha-sem u da pynbaad ki wym yoh u yei sumaar neidaw wa pynslem ki pulit wow leh yei kaam yong ki.
Uni u bru wa tip kam u Rohit Pawar dapoi u ha kani ka Hospital hei step ka 2 tarik uni u bnai heiwa da pynbaad wa hap yang u 10 kynta chwa wow chah pooid u heiwa kiwa ha-yung ha-sem u da ong ki wym nood ki Doctor u pooid kat wym pu ye ki pulit u pyndep yei kaamram ki.
U Rohit toh uwa chong chnong ka Mankhurd wei uwa kreh wa ka BARC wei da chah dat u hei miet ka 1 tarik ha ki bru wa suba kiwa da yang khap oo. Hadien wa yoh u sumaar oo da booh ya oo hapoh ka Trauma ICU heiwa ki Doctor da ong ki wa da lait u nei maa.
Ki bor pynlai ka Hospital da ong ki wa kani ka wait da psiah ko hadooh 1.5 Inches chapoh i khlieh u Rohit neiliang tidiang wei heipor wa poi u cha ka thaw sumaar ym em chah ktah i bor jabieñ u hanla man iwa jia wa maa bha tangwa u pooid yow sai ya ka wait toh iwa ye u leh.
Da pyntip leh wa u Rohit toh uwa em yong bru hi hadien wa dep u pooid wei da yoo ki dak ki chin wa da sdang chait u.
Tangwa kiwa ha-yung ha-sem u Rohit ym em hun ki deiwa ong wa chah pooid u heipor 8:00 waje i step hadien wa neh ka wait 10 kynta ha khlieh u.
Da pyntip ki wa ya u Rohit nyngkong da kit cha Shatabdi Hospital da ki lok u mar ya chah dat u wei hadien won da rah ya oo cha Sion Hospital. U Rohit da chah dat u hadien wa em i ya kajia heipor wa lai u cha PMG Colony Market ha Mankhurd heiwa ki bru wa em kamwa 3-5 ngut kiwa da khyrrup oo kiwa da thmu wow pynyap syndon oo heiwa da thlieh oo da ka wait na khlieh.
Neiliang ki pulit da booh FIR ki ha Lallubhai Chowki Police Station, Mankhurd.
Discussion about this post